Moti i keq dhe rritjet e infektimeve me koronavirus kanë bërë që zyrat e ambasadave në disa shtete të pezullojnë përkohësisht punimet. Lajmin e ka bërë të ditur sot Ministria për Evropën dhe Punët e Jashtme, e cila njofton se për shkak të kushteve të vështira klimatike dhe situatës nga pandemia e koronavirusit, do të ketë kufizime në disa zyra diplomatike të Shqipërisë. “Pikat” që do të preken janë ato në Stamboll, Ankara, Mynih, Romë dhe Athinë. Sipas njoftimit zyrtar, në vendet e sipërpërmendura, pezullimi i punës vjen edhe si shkak i vendimit të qeverive përkatëse.
“Për shkak të kushteve të vështira klimatike dhe situatës nga pandemia Covid-19, do të ketë kufizime apo ndërprerje të punës në përfaqësitë diplomatike të Shqipërisë në Stamboll, Ankara, Mynih, Romë dhe Athinë. Në disa prej shteteve të përmendura më lart, kufizimet apo ndërprerja e punës vijnë edhe si shkak i vendimit të qeverive përkatëse, për të përballuar situatën e krijuar nga pandemia dhe kushtet e vështira klimatike.
Në raste emergjencash, lutem kontaktoni në numrat e posaçëm të përfaqësive diplomatike: Stamboll: +905459461456; Ankara: +905449622617; Mynih: +4915237913997; Romë: +393420498192 dhe Athinë: +306941658183. Ministria për Evropën dhe Punët e Jashtme mbetet e angazhuar për t’ju përgjigjur qytetarëve në kohë reale”, thuhet në njoftim. Ndërsa nuk bëhet me dije sa do të zgjas kjo situatë pasi vendet në fjalë janë pushtuar nga moti keq dhe regjistrojnë çdo ditë numër të lartë infektimesh me koronavirus.
