Mjeku me origjinë shqiptare Mario Ademaj, i cili punon në një nga spitalet e Çikagos në Shtetet e Bashkuara tha në një intervistë për emisionin “Opinion” se situata atje është shumë e rëndë.
Ai tha se në Çikago testimi është rezervuar vetëm për ata që kanë sëmundje të tjera shoqëruse që mund të rrezikojnë jetën e pacientëve. Ndërsa personat me simptoma të lehta po i trajtohen sikur kanë infeksion normal.
“I këshillojmë të rrinë në shtëpi. Nëse kanë simptoma më të rënda, atëherë i shtrojmë në spital”, tha ai.
Ademaj deklaroi se situata në Çikago po bëhej si ajo në Nju Jork.
“Ka shumë njerëz të prekur. Këtu po bëhet një nga qendrat epidemike si në Nju Jork. Në ShBA është pak e vështirë të vlerësosh situatën, sepse është vend shumë i madh. Gjysmat e respiratorëve i kemi që tani në përdorim. Do na rritet fluksi. Meraku ynë është se do tejkalohet kapaciteti i spitaleve. Kemi merak se do arrijmë në fazën, ku të zgjedhim kë të kurojmë ose jo,” tha ai.
Ai dha gjithashtu disa këshilla se çfarë mediakamentesh mund të përdorin njerëzit kur kanë simpotma që shkaktohen nga COVID-19.
“Për temperaturë këshilloj acetaminofen ose paracetamol, jo ibuprofen. Për kollë, robitussin. Për dhimbje gryke, një gotë më ujë të ngrohtë me gjysëm luge kripe bëje gargarë në grykë 2 herë në ditë. Në qoftë se kemi shenja, ku fytyra bëhet blu ose dhimbje në gjoks merrni në telefon ambulancën për shtrim në spital”, tha mjeku.
