Nga Enkel Demi
Shqipëria është një vend qesharak.
Ky është i vetmi përfundim që mund të nxjerrësh mbrëmjen e sotme, tek shkruan dy rradhë, të cilat ka gjasë që nesër në mëngjes të jenë krejt jashtë loje, sepse këta mund ta dredhin sërish gjatë natës.
Para se të ulesha i hodha një sy lajmeve të ditës. Ngulmoj të ditës, jo të javës. Ka tituj plot gazmend si fjala vjen:
“Basha: Beteja për standardet e drejtësisë u fitua për Shqipërinë e për çdo shqiptar”
“Nishani: Përgëzoj aktorët politikë për konsensusin. Reforma rëndësi për të ardhmen”
“Pesë garancitë e reformës në drejtësi sipas Berishës”
“PDIU përshëndet konsensusin për reformën në drejtësi”
“PPE: Roli i Bashës qendror në marrëveshjen për reformën në drejtësi”
Dhe në fund, pasdite, pak para se Alban Hoxha të kthehej në hero të Budapestit del lajmi që Lulit ju prish mendja dhe kërkon negociata të reja, për pika të reja ose më mirë: “Upps!!! U talla”.
Çfarë t’i themi garancive të Berishës? Ndjesës së Eduard Selamit që u nxitua? Presidentit që na përgëzoi? Ilir Metës që u lumturua që gjeti marrëveshje? Ambasadorit Lu që i ka rënë pika? Çfarë t’i themi Joseph Daul, i cili ngulmoi të theksonte se Lulzim Basha ka alamet roli në gjetjen e rrugëzgjidhjes së krizës? Çfarë t’i themi zonjës Merkel që dje nuk thirri në telefon Erdoganin, por Lulin? Asaj të paktën t’i paguajmë impulset.
Ah, po i themi, Luli u tall, është shakator, prandaj e ka për zemër që nesër të bëhet kryeministër.
Nëse e kalon gjithë ditën e sotme dhe mbërrin në mbrëmje, kupton që Shqipëria është një vend qesharak, i cili udhëhiqet nga do pupacë. Është i vetmi vend në botë, ku del biri i botës mban një orë e gjysëm fjalim se fitoi, meqë të tërë shkuan pas qerres së tij dhe pas ca orësh thotë: “Jo, por tani që e mola lopën po e derdh kovën me qumësht”. Ky njeri nuk ka respekt për veten e tij, jo më të ketë respekt për ligjvënësit e PD-së, të cilët nesër duhet të bëjnë një nga zgjedhjet më të vështira për një politikan. Nesër ose zgjedhin kaushin e tipit Kim Jong Un, ose dalin nga vatha dhe mbyllin karrierën politike, të paktën në atë parti. E gjitha kjo, vetëm se Luli të lë kopilin në derë, me atë pamjen e tij gaztore, me atë ballë të lartë, me atë portret me tipare mongoloite dhe ato flokë të ngjyer aq shumë në të zez.
Shqipëria është një vend qesharak.
Faik Konica dikur e mbushte gojën dhe thoshte: “Shqipëri të kam dhjerë, si nuk të kuptova një herë”. Hë më, Lul po ti kupton gjë?
