Historia përsëritet, përjashtimi i Eduard Selamit në pranverën e vitit 1995 pas dështimit të referendumit, deri tek “tradhëtia” e fundit.
“Unë do jem në PD pavarësisht nëse më përjashtojnë apo jo. Por më vjen keq të them se PD-ja është nisur në rrugën e deformimit të demokracisë dhe për këtë po kontribon pikërisht Sali Berisha”
“Jam reformator dhe jo rrebel” tha Eduard Selami në marsin e vitit 1995, kur po përjashtohej nga Partia Demokratike. Në atë kohë ishte kryetar i kësaj partie. Sot ndoshta do t’i duhet të thotë “Jam reformator dhe jo tradhëtar”, sepse Eduard Selami ka deklaruar dje votën pro reformës në drejtësi në kundërshtim me vendimin politik të marrë nga Partia Demokratike, tashmë e drejtuar nga Lulzim Basha. Për këtë deklaratë të tij, Selami ka nisur të quhet tradhëtarë nëpër mediat e PD-së. Ajo që e njëson situatën është se edhe në atë kohë të marsit të vitit 1995 defakto PD drejtohej nga Sali Berisha edhe sot duket se ndodh e njëjta gjë. Eduard Selami e Lulzim Basha, duken më shumë të jenë viktima të të njëjtit person. Atij që vetë e kanë mbështetur dhe dëgjuar qorrazi.
Në gushtin e vitit 1992, kur Sali Berisha po projektonte Partinë Demokratike pa “tardhëtarë” kur përjashtoi shumicën e themeluesve të kësaj partie, Eduard Selami ishte në krah të tij, në konferencën famëkeqe të përjashtimit të mocionistëve. Iu desh ta drejtonte vetë atë konferencë ku Berisha po vendoste diktatin mbi partinë e themeluar si shpresë për shqiptarët. Selami por edhe të tjerët nuk mundën ta ndalojnë madje as provuan. Ishte ai diktat që do të vepronte shpejt edhe mbi Selamin. U deshën vetëm tri vite për tu gjendur vetë në rolin e të akuzuarve për të përfunduar në finale me përjashtim. Eduard Selami i di pasojat që do ti vijnë pas vendimit të djeshëm për të dalë kundër grupit parlamentar. Ajo që e pret Eduard Selamin dihet tashmë. Ka nisur të quhet tradhëtarë dhe vendimi për përjashtim nuk do të vonojë. Me sa duket Selami i ka marrë parasysh të gjitha këto pasoja sepse është një rrugë të cilën e ka shkelur dhe do t’i gjejë më kollaj shtigjet për të dalë.
Përjashtimi i Eduard Slamit mars 1995
21 vite më parë, Eduard Selami u përjashtua nga Partia Demokratike si kurban për dështimin e kushtetutës së vitit 1995. Në atë kohë Eduard Selami ishte kryetar i PD-së dhe udhëhoqi fushatën e mazhorancës demokrate për miratimin e kushtetutës e cila nuk u votua nga shqiptarët.
Pas këtij momenti, nisi edhe beteja brenda PD-së e cila përfundoi me përjashtimin e Eduard Selamit nga kjo parti. Kishte qënë themeleues i kësaj partie dhe një ndër njerzit më të rëndësishëm të saj, në orët e para të themelimit. Por historia e zhvillimeve politike e largoi nga PD për ta lënë atë rreth 17 vite larg kësaj partie dhe larg Shqipërisë.
“Ata që mendojnë se do të më mbyllin gojën dhe do të më eleminojnë duke më shkarkuar nga funsksionet politike e kanë gabim. Kjo kohë tashmë ka kaluar. Tani është koha e konkurencës së ideve, e konkurencës së alternativave dhe e aftësive dhe jo koha e prapaskenave dhe e eleminimit”, tha Selami më 4 mars 1995. Por ditët që vijuan konfirmuan të kundërtën. Në fakt Eduard Selami u eliminua krejtësisht politikisht. U përjashtua jo vetëm si kryetar por edhe si anëtar i PD-së.
Dhe ja çfar thoshte ai pas konferencës së 5 marsit të atij vitit: Është apsurde të pranoj që nuk jam më anëtar i kryesisë së PD-së. Megjithatë unë e kam thënë dhe do vazhdoj ta them se do të jem aty për të kontribuar brenda Partisë Demokratike. S’ka rëndësi si kryetar apo si anëtarë i thjeshtë. Unë do jem në PD pavarësisht në se më përjashtojnë apo jo. Por më vjen keq të them se PD-ja është nisur në rrugën e deformimit të demokracisë dhe për këtë po kontribon pikërisht Sali Berisha”, thotë Selami për gazetën Koha Jonë më 6 mars 1995.
Në ato ditë të debateve brenda partisë demokratike u tha e ç’nuk u tha nga Selami e nga pala tjetër që drejtohej në deklarata pubike nga sekretari i përgjithshëm i PD-së në atë kohë, Tritan Shehu.
Një ndër deklaratat e Selamit që mbahen mend janë ato kundër berishës: “Nuk më pëlqente e kaluara e Berishës, ndaj dhe u ndëshkova” ose kur në PD të mos vendosin fondamentalistët, progresi i Shqipërisë do të jetë më i shpejtë”.
Megjithse kishte deklaruar se nuk do të largohej nga PD-ja, se do të vazhdonte të kontribonte si anëtar i thjeshtë i saj për demokracinë brenda partisë, kishte deklaruar se ishte misionar në politikë, Selami u detyrua të largohet jo vetëm nga PD-ja por edhe nga Shqipëria.
Në vitin 1995, pas përjashtimit nga PD Selami u largua drejt Shteteve të Bashkuara të Amerikës ku qëndroi deri në pranverën e vitit 2013. U kthye pikërisht në fushatën e zgjedhjeve të këtij viti si kandidat për deputet i Partisë që e kishte demaskuar aq rëndë në krye të së cilës ishte i njëjti person, Sali Berisha. Dhe ja ku jemi sot në një moment kur historia përsëritet. Selami mund të përjashtohet sërish nga PD dhe sërish për kushtetutën. Kësaj here ndoshta si “tradhëtar”.
