Kryetarja e LSI-së, Monika Kryemadhi nga foltorja e Kuvendit ka prezantuar skemën e forcës së saj politike, sesi mund të dalin nga varfëria familjet shqiptare.
Kryemadhi thotë se kjo realizohet duke çuar fondin e ndihmës ekonomike 2% të GDP, çka do të thotë që mbi 80 mijë familje do tu jepet 240 dollarë në muaj nga qeveria.
“Konkretisht ne besojmë se mund t’i japim fund varfërisë absolute për çdo shqiptar vetëm nëse: Fondi i ndihmës ekonomike do të shkojë 2% të GDP.
Kjo do të thotë që mbi 80 mijë familje me mesatarisht 4 anëtarë do tu jepet nga qeveria 240 dollarë në muaj për çdo familje, pra 2 dollarë në ditë për cdo anëtar të saj në mënyrë për të kaluar pragun e varfërisë absolute. Përmes kësaj skemë mbi 300 mijë të varfër do të dilnin nga varfëria absolute në të cilën ndodhen aktualisht”, shtoi ajo.
Në fund Kryemadhi theksoi se për LSI kjo është financiarisht e mundur dhe realisht si objektiv i realizueshëm. “Mjafton të kursejmë dy koncesione abuzive të shëndetësisë dhe kjo skemë do të jetë efikase.”, tha kryetarja e LSI.
