1500 delegatët zgjedhin sot anëtarët e rinj të Asamblesë Kombëtare, anëtarët e Komisionit të Grancive Statutore dhe kryetarin e ri të FRESSH
Fjalimi i kryetarit të PS-së Edi Rama çel sot punimet e Kongresit të tetë zgjedhor të PS-së. Më pas kryetari i Asamblesë Kombëtare të PS-së, Gramoz Ruçi do të prezantojë një raport mbi ecurinë dhe rezultatet e fushatës së antarësimeve në PS. Kurse veprimtarinë mes dy kongreseve do ta paraqesë Komisioni i Garancive Statutore.
Pas pyetjeve dhe diskutimeve, pikë e pestë e rendit të ditës janë ndryshimet në statut dhe në fund zgjedhja e drejtuesve të organeve qendrore të PS.
Në kongresin e sotëm të socialistëve është ftuar të marrë pjesë ish lideri i PS-së Fatos Nano. Të ftuar në kongresin e socialistëve janë Gianni Pittella dhe Massimo D’Alema, të cilët së bashku me të ftuar të tjerë ndërkombëtarë do të përshëndesin punimet e Kongresit, ndërsa Matteo Renzi, Martin Shultz, Tony Blair dhe Johanes Svoboda do të jenë të pranishëm nëpërmjet video mesazheve.
Ndërkohë në kongres votohen 175 anëtarët e rinj të Asamblesë Kombëtare dhe 9 anëtarët e Komisionit të Garancive Statutore. Nesër votohet për kryetarin e ri të Forumit Rinor Eurosocialist, FRESSH.
