Ka than' i moçmi: 

“Shqiptari e ka zakon që kundështon para se të marrë vesh".

                          -Faik Konica

“Konferenca e Donatorëve një turp”/ Abilekaj: Presidenti provoi me argumenta ligjore shkeljet e Gjonajt (film)

Nga Ejona 0

Gazetari Enton Abilekaj ka komentuar përplasjen e fundit mes institucionit të Presidencës dhe Ministrisë së Drejtësisë, ku Ilir Meta paralajmëroi sot me padi ministren Etilda Gjonaj.

Abilekaj tha se presidenti e ka nxjerrë qartë shkeljen që i është bërë Kushtetutës me emërimet për Gjykatën Kushtetuese, veçanërisht me publikimin ne Fletoren Zyrtare të një vendimi të KED, me urdhër të Gjonajt.

Sipas gazetarit nuk ka asnjë ligj, dhe asnjë vendim institucionesh, që mund të dalin mbi Kushtetutën, e cila e parashikon qartë sesi është radha e propozimeve për emërimet në Gjykatën Kushtetuese.
Lidhur me tubimin e 2 Marsit, Abilekaj tha se aktin e Metës nuk mund ta marrim si një akt të veçuar, por në kompleks, të gjithë përplasjes së fundit institucionale.
“Po ta marrim këtë thirrje si një akt të veçuar të Metës, do thoshim që ai ka zhveshur kostumin e presidentit dhe ka zbritur në rrugë për tu bërë palë. Po të shohim kontekstin pastaj se pse kjo ka ndodhur, se pse presidenti nuk mban pozicionin komod për të qendruar jashtë palëve, mjafton të shohim që parlamenti kaloi pak ditë ligjin për betimin e gjyqtarëve të Kushtetutës, shohim se ka një tentativë për ta bërë kushtetutën sipas një vullneti partiak.
Ligji për betimin e gjyqtarëve është antikushtetues, pasi nuk u prit as opinioni i Komisionit të Venecias, që ishte kërkuar nga ana e Kuvendit për këtë cështje.
Dvorani nuk ka asnjë kompetencë më shumë se anëtarët e tjerë të KED, ai nuk mund të ndërhyjë, dhe aq më pak të vendosë afatet e njërit apo tjetrit institucion. Këto janë kompetenca që kalojnë përtej KED, ka një ligj që rregullon afatet e presidentit për përzgjedhjen e anëtarëve të Gjykatës Kushtetuese, por ky ligj nuk mund të respektohet në rast se nuk respektohet Kushtetuta.
Ligji nuk është më i fortë se Kushtetuta, nuk e përcakton KED se kur i takon presidentit që të zgjedhë vakancat. Kemi të bëjmë me një shkelje të njëpasnjëshme të Kushtetutës nga mazhoranca dhe nga KED, vazhdon që të shtyhet plotësimi i Gjykatës së Lartë, vetëm e vetëm që të kapet Gjykata Kushtetuese. Me marrjen në dorë të Gjykatës Kushtetuese, mazhoranca plotëson marrjen në dorë të të gjitha institucioneve të drejtësisë”, u shpreh Abilekaj, i cili u shpreh nga ana tjetër që nuk ka asnjë shans që presidenti të shpërndajë Kuvendin.
Sipas tij derimë tani Meta nuk ka kryer asnjë shkelje të Kushtetutës, gjë e cila është konfirmuar dhe nga opinioni i Komisionit të Venecias.
“Është e qartë se presidenti nuk mund ta shpërndajë dot Parlamentin, pasi nuk plotësohet asnjë prej kushteve që parashikon kushtetuta, që janë në momentin e moszgjedhjes së kryeministrit, mocionit të besimit, por nuk i jepet e drejta për ta shpërndarë Kuvendin në raste të tjera.
Nuk mund të bëhet një shkelje e Kushtetutës në emër të një shkelje tjetër. Deri tani presidenti, pavarësisht aksionit të tij politik, me aktet e veta nuk ka pasur asnjë shkelje të Kushtetutës. Edhe në rastin e zgjedhjeve të 30 Qershorit, Venecia tha se presidenti nuk kishte kryer shkelje, por tejkalim të kompetencave.
Nga pikëpamja politike lëvizja e presidentit duhet parë nga pikëpamja etike, por në këtë rast lind pyetja, a jemi ne në kushtet kur mund të flasim për etikë? Kjo pikë lë vend për diskutim.
Nëse sot nuk do kishte një president që të bënte të ditur shkeljet kushtetuese, ne nuk do të ishim njohur me këto skandale. Nëse ne i themi që Rama po i merr të gjitha, dhe nuk kemi dokumente, atëherë kjo do të mbetej në kuadrin e propagandës”, tha gazetari.
Lidhur me nismën e Metës për ta çuar Gjonajn në SPAK, Abilekaj tha se ministrja nuk dha asnjë argument ligjor, dhe se derimë tani të paktën imstitucionalisht presidenti ka dalë i fituar.
“Ne nuk e dimë se çfarë do të bëjë SPAK, pasi deri tani kemi parë institucione të kapura nga mazhoranca. Ministrja nuk ka asnjë kompetencë që të botojë në Fletoren Zyrtare njoftime të dhëna nga një institucion i pavarur i drejtësisë.
Në përgjigjen që dha sot ministrja nuk pati asnjë argument ligjor, ishte një përgjigje e shkruar nga Edi Rama, ishte një përgjigje prej papagalli, ku nuk jepej asnjë sqarim.
Janë të kapur në flagrancë, dhe në vend se të justifikohen, të kërkojnë falje dhe të largohen, kërkojnë që të mpijnë opinionin publik në sajë të bindjes së tyre politike. Presidenti ka të drejtë në këtë rast, pasi ka dhënë argumente ligjore, që derimë tani nuk janë hedhur poshtë nga ana e mazhorancës. Nuk mund ta ndryshojë një ligj Kushtetutën.
Të gjithë këto shkelje bëhen që njerëzit të mos reagojnë, të pranojnë instalimin e një diktature, dhe që ne të jemi këtu si një grup potencial emigrantësh për të ikur nga Shqipëria”, tha gazetari, që komentoi dhe Komferencën e Donatorëve, që sipas tij tregoi mungesën e besimit të qeveria shqiptare.
“Nuk e di nëse Konferenca e Donatorëve dha më shumë pikë për Edi Ramën, më shumë sesa tregoi që mbështetja për Shqipërinë ka qenë shumë e madhe. Rezultati në fakt që u soll në mënyrë tinzare nga Edi Rama, nuk është gjë tjetër më shumë sesa mbështetje për shqiptarët, dhe hezitim për qeverinë e tij.
Shumë prej fondeve nuk do të implementohen përmes qeverisë, por do të bëhen përmes vetë kompanive të tjera. Vetë SHBA e ka treguar më së miri mungesën e besimit, me krijimin e agjensisë së transparencës për fondet që marrim ne. Në çdo vend normal qeveria do të ishte turpëruar nga kjo gjë”, u shpreh Abilekaj.
Ndërkohë që nuk ka lënë mangët as një koment për deklarata të ndryshme që thonë se mund të ketë një arrestim të Metës, në ditën e mitingut.
“Avokat Ngjela ka ca ligje që vetëm ai i di që ekzistojnë dhe ne nuk i shohim dot, ose i interpreton në një mënyrë që për ne nuk është racionale. Nuk ka asnjë shans që të arrestohet presidenti pse po mbron Kushtetutën.
Presidenti për mendimin tim mund ta shfrytëzojë këtë moment për të përfituar politikisht, por që do të ishte e gabuar. Është për tu përshëndetur mënyra se si kreu i shtetit e ka mbrojtur Kushtetutën, por kjo nuk do të thotë që kjo duhet të përkthehet me vota për LSI-në”, deklaroi gazetari, që shtoi se tubimit të thirrur nga Meta në 2 Mars duhet ti bashkohet dhe opozita, pasi ky është një manifestim në mbrojtje të Kushtetutës.

Publiée par Kevin Hysenbelli sur Vendredi 21 février 2020

Loading...

Lini një koment

Adresa juaj e Email-it nuk do të bëhet publike

Mund të përdorni HTML tags dhe atributet: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.

gjithësej