Koço Kokëdhima nuk ka ndër mend të heqë dorë nga politika, megjithëse Gjykata Kushtetuese i hoqi mandatin pasi rezultoi se kishte përfituar fonde në kundërshtim me ligjin duke qenë deputet. Kokëdhima, i cili ndodhet me pushime në jug të vendit, është shprehur se duke qenë anëtar i Partisë Socialiste do të rikandidojë në zgjedhjet e ardhshme të përgjithshme në qershor 2017.
“Dua të jem më afër politikës dhe më afër qytetarëve. Do të rikandidoj sërish në zgjedhjet e vitit 2017”, tha ai për “ABC News”.
Njëherësh ai nuk është shtyrë më tej në arsyetimin e tij për rikandidimin si ligjvënës në zgjedhjet e verës së ardhshme, as është ngacmuar nga gazetari se me cilën forcë politike do kandidojë. Pasi është lënë shumë pas dore sidomos pas deklaratave të tij se nuk e kishte mbrojtur grupi parlamentar i PS përballë opozitës dhe Kushtetueses siç veproi me dy deputetë të tjerë të PS. Më pas, ish-deputeti i Qarkut të Vlorës ka replikuar ndaj batutës së kryeministrit Rama, i cili në një aktivitet pak kohë më parë në Vuno tha se do të pleqëronte me të pikërisht në këtë fshat.
“Për këtë punën e pleqërimit, unë them se nuk do të pleqëroj as në Vuno dhe as në Gjirin e Lalëzit… Nuk kam ndër mend, por do të punoj deri në ditën e fundit të jetës”, u shpreh Kokëdhima. Marrëdhëniet mes Ramës dhe Kokëdhimës janë ftohur gjithnjë e më shumë pas heqjes së mandatit të deputetit nga Gjykata Kushtetuse.
/gazetatema.net/
