Kryetari i PDIU-së në takim me banorët e bashkisë Vau i Dejës: Rama dhe Basha të ulen në një tavolinë, në mënyrë që t’i jepet fund krizës politike. Vendi duhet të futet në hullinjtë e kushtetueshmërisë
“Ne kemi veç një Atdhe dhe prandaj s’duhet ta shkatërrojmë këtë vend. Atdheu ynë është këtu!”, deklaroi kështu kryetari i PDIU-së Shpëtim Idrizi në një takim me banorë të Bashkisë Vau i Dejës. Në fjalën e tij Idrizi theksoi se Partia Drejtësi, Integrim dhe Unitet propozon që Rama dhe Basha të ulen në një tavolinë, në mënyrë që t’i jepet fund krizës politike. “Vendi 
duhet të futet në hullinjtë e kushtetueshmërisë, sepse po rrëshqasim në një krizë parlamentare dhe politike, e cila do të ketë një kosto shumë të lartë për vendin.
Ndaj është e nevojshme që sa më shpejt të plotësohet reforma në drejtësi dhe Vetting-u, miratimi i të cilave hap rrugën për integrimin e vendit”, tha Idrizi.
Kreu i PDIU-së foli edhe për zgjedhjen e presidentit të ri duke propozuar zgjedhjen e presidentit nga populli. “Meqënëse jemi në prag të zgjedhjes së Presidentit të ri, PDIU mbështet zgjedhjen e kreut të shtetit nga populli. Le të jenë shqiptarët ata që do të vendosin për Presidentin e ri dhe këtë propozim PDIU e ka bërë shumë kohë më parë”, tha Idrizi. Sa i përket reformës zgjedhore, Idrizi theksoi se PDIU propozon një sistem zgjedhor proporcional kombëtar. Ai përsëriti qëndrimin e tij se koalicionet nuk duhet të bëhen para zgjedhjeve, por pas tyre.
“PDIU mbështet edhe numërimin elektronik, por ky proces duhet të jetë i monitoruar nga një grup inxhinierësh.
PDIU është një parti kombëtare, e interesit kombëtar dhe e njerëzve. Ne jemi të qartë dhe do shpalosim disa projekte të rëndësishme për vendin. Jemi të qartë për bashkimin kombëtar”, tha Idrizi.
