Në lidhje me bisedimet dypalëshe, kryetari i PDIU-së, Shpëtim Idrizi, është shprehur se deri tani janë shtruar dhe po marrin zgjidhje vetëm çështje që janë një interes madhor për Greqinë dhe jo për Shqipërinë.
I ftuar sot në emisionin “5 pyetje nga Babaramo” në Report TV, Idrizi radhiti se cilat janë ato sipas tij:
“Ligji për toponimet është kërkesë e grekëve, Shqipëria e ka bërë. Një ligj absurd, që ne të mbajmë toponimet e Greqisë. Në pasaportat e shtetit shqiptar, ka emërtime për njerëz që, vendlindjen e kanë në Çamëri. Babai im ka lindur në Margëlliç, ka çertifikatë lindje, ka dhe pasaportën e shtetit shqiptar, ku shkruhet Margëlliç. Sot, është i detyruar ta ndërrojë pasaportën dhe ta vendosë në greqisht, Margariti.
Ligji për minoritetet, ka qenë gjithashtu një kërkesë e Micotaqit që më 1993. Është absurd, sepse Kosova që është e detyruar me Kushtetutën që ka, është një shtet me 6 minoritete. Shqipëria njohu 9 minoritete. Është hequr koncepti i zonave minoritare. Që më 1936, në kohën e Mbretit Zog, njihej Finiqi dhe Dropulli si zona minoritare. Greqia ndaj ka vendosur ta zhvendosë gjithnjë zonën minoritare drejt Himarës. Kombësia nuk është çështje se si ndihesh, për është çështje fakti. Unë jam shqiptar me nënë e me babë dhe jam regjistruar shtetas shqiptar me nënë e babë shqiptare. Kjo është shumë e qartë edhe në Konventën evropiane të të drejtave të njeriut.
Këto zona kanë diskriminim pozitiv, ka tabela në gjuhën greke dhe shqipe, kur Greqia nuk e njeh marrëveshjen kuadër dhe është një vend që e ka pastruar etnikisht Greqinë nga gjithë pakicat e tjera. Unë i kam kërkuar ministrisë sonë të jashtme, që të kërkojë nga pala greke, që për shqiptarët që janë në zonën e Çamërisë, ku flasin të gjithë shqip, Shqipëria të kërkojë statusin e kombësisë shqiptare që e kanë patur që më 1927.
Minoritarët mund të shkojnë edhe në Kukës, ne s’mund ta mohojmë këtë. Mos të bëhemi kaq filantrop, se më pas do na dalë që të vëmë dhe vende të përcaktuara në parlament.
Kërkesë e kahershme e Greqisë janë edhe varrezat e ushtarëve grekë në Shqipëri. Çështje si varreza dhe Ligji i Luftës vijojnë si çështje pajtimi. Ne s’kemi qenë në konflikt me Greqinë, por ishin ata që na shpallën luftë, dhe që mësynë, ulën flamurin shqiptar dhe ngritën atë të Vorio Epirit. Kryeministri grek i kohës, Metaksa, ishte i vetmi në Europë që përshëndeti pushtimin e Shqipërisë nga Italia, si fashist që ishte.
Interesi i Shqipërisë do të ishte nisja nga kufijtë tokësorë. Protokolli i Firences nuk është ratifikuar kurrë nga Greqia. Është masakra e Peshkëpisë më 1995, pala greke edhe pse hyri në Shqipëri dhe vrau në territorin shqiptar, thoshte nuk jemi të sigurt, nëse i kanë vrarë në terrirotrin shqiptar apo grek.
Interesi i Shqipërisë ishte për kufijtë tokësorë, interesi i Greqisë ishte për delimitimin e ujërave. Ne jemi futur me kokë në det për interesat e qeverisë greke.”
Shpëtim Idrizi ngriti dyshime se në tryezë po negociohen kufijtë detarë dhe jo zonat ekonomike ekskluzive, çka do të thotë që Greqia mund të kërkojë një kufi të ri detar dhe jo atë që është respektuar deri para marrëveshjes së 2009-s mes dy vendeve.
“Në momentin që përcaktohen kufijtë detarë, më pas nis ndarja për zonat ekonomike”, – tha Idrizi, duke aluduar se edhe bisedimet për këtë qëllim kanë nisur.
Sa i takon mungesës së reciprocitetit, Idrizi shtoi:
“Shqipëria e nisi zbatimin për varrezat dhe gërmimet e ushtarëve grekë, përse Greqia nuk e ka hequr, por është mjaftuar vetëm me një premtim.”
