Kryeministri Edi Rama ka akuzuar opozitën se po pengon hapjen e negociatave me BE duke bllokuar në mënyrë të qëllimshme ligjin e vetting-ut, që sipas Ramës nuk ka asnjë kusht tjetër për hapjen e tyre përveç këtij ligji.
“Kryefjala sot është përsëri Vetting-u i gjykatësve dhe prokurorëve që ju e mbani peng. Vendet anëtare të BE-së e vlerësuan progresin e qëndrueshëm që ka bërë Shqipëria”, ka deklaruar Rama.
Gjatë fjalës së mbajtur në Kuvend, Rama gjithashtu foli edhe për 5 prioritet e kërkuara nga BE, duke thënë se 5 prioritetet që lidhen me reformat janë thelbësore për çdo vend që synon integrimin, por këto prioritete janë vetëm kritere dhe jo kushte për anëtarësim, tha Rama.
Rama: “Kusht është Vetting-u, ligji që i hap rrugë reformës në drejtësi. Të tjerat janë dokërrat e dëshpërimit tuaj të pangushëllueshëm. Ju hidhni përditë baltë e akuza, me shpresën se shqiptarët do t’ju besojnë juve”.
