Ministri i Jashtëm Gent Cakaj është kthyer sot nga Italia, ku qëndroi për disa orë, teksa shoqëroi 30 mjekë shqiptarë që do të asistojnë në epiqendrën e koronavirusit, në Lombardi.
Cakaj tërhoqi vëmendje ditën e djeshme, pasi mbërriti në Itali pa maskë apo doreza mbrojtëse.
Ai është kthyer sot po me të njëjtin avion të “Air Albania”, me të cilin u kthyen edhe 112 shqiptarë që ishin bllokuar në Itali.
Është e paqartë, nëse Cakaj do të vetëkarantinohet sipas Aktit Normativ të qeverisë, i cili detyron izolimin e çdo personi të kthyer nga Italia për 14 ditë. Nëse ai nuk e bën një gjë të tillë, rrezikon të dënohet me gati 5 mijë euro gjobë.
Akti Normativ:
Dënohet me gjobë në masën 700 000 (shtatëqind mijë) lekë:
b) Shtetasi, i cili hyn nga zonat e prekura në territorin e Republikës së Shqipërisë, që nuk vetëkarantinohet për një periudhë 14-ditore në ambientet e banesës së tij, si një masë parandaluese për mospërhapjen e infeksionit të shkaktuar nga COVID–19.
