Ditën e sotme u zhvillua protesta e paralajmëruar nga gazetarët, kundër paketës “Antishpifje”, përpara parlamentit të Shqipërisë.
Në protestë ishin të pranishëm gazetarë të shumtë në numër, studentë dhe pedagogë të gazetarisë, shoqata të gazetarëve si dhe aktivistë të lëvizjes Vetëvendosje në Tiranë, me qëllimin e përbashkët; tërheqjen e ligjit nga Parlamenti.
Gazetari Bledi Koka i ftuar në studion e Good Morning Albanians tha se paketa Antishpifje është një ligj që “i pret duart” medias, dhe shtoi se një ligj për Antishpifje duhet për politikanët të cilët nuk mbajnë përgjegjësi për atë që thonë.
“Më shumë se sa një ligj antishpifje për median ne duhet të vëmë një ligj antishpifje për politikanët, të cilët nuk mbajnë përgjegjësi për atë që thonë. Shpifësit më të mëdhenj janë ata që sot mendojnë se do të rregullojnë median”, – tha Koka.
Mira Kazhani, drejtuesja e portalit TiranaPost shprehu gjithashtu opinionin e saj në studio për këtë projektligj duke thënë se kjo paketë është një dikaturë digjitale, e paketuar mirë që të joshë. Kazhani ndër të tjera u shpreh skeptike ndaj institucionit të AMA-s.
“Kur Durrësi, Tirana, Thumana po rindërtohet nuk mund të merremi me rindërtimin e medias dhe aq më pak nuk mund ta bëjë këtë një institucion si AMA që votohet nga Parlamenti dhe kontrollohet nga qeveria”,- u shpreh Kazhani.
Drejtuesi i portalit dosja.al, Enton Abilekaj në një lidhje live përmes gazetarit të Euronews Albania shprehu shqetësimin ndaj këtij projektligji teksa tha se se kjo rezistencë nuk është një aksion mbrojtes i portaleve ndaj një ligji por është një aksion mbrojtës i gazetarëve ndaj lirisë së shtypit.
“Ky është një ligj për t’i mbyllur gojën shqiptarëve, dhe jo portaleve apo televizionit. Portalet dhe televizionet janë pasqyra ku shqiptarët shprehin shqetësimet e tyre”, – shtoi ai.
E pranishme në protestë ishte dhe drejtuesja e portalit NewsBomb, Anila Basha e cila thekson rëndësinë e një procesi vetërregullues, por të bërë nga media dhe jo nga qeveria. Sipas saj, si një vend në tranzicion nuk mund të pretendohet se një institucion si AMA është i depolitizuar, për sa kohë që anëtarët e këtij bordi vijnë nga Parlamenti.
Aleksandër Çipa, kryetari i Unionit të Gazetarëve në Shqipëri, i pranishëm në protestë argumenton se këto dy projektligje krijojnë precendentë të rrezikshëm të censurimit si dhe intimidojnë politikat e pavarura editoriale të redaksive online. Çipa refuzon mënyrën si është konceptuar metodologjikisht ky draft dhe bashkë me të, bordin e AMA-s dhe Këshillin e Ankesave.
“Nëse do të miratohet ky projektligj, do t’i drejtohemi Presidentit për të mos ta dekretuar dhe do të ndjekim të gjitha hapat Kushtetuese, që pse jo mbërritjen deri te Gjykata Kushtetuese”, tha Çipa.
