Kryeministri Edi Rama, ditën e sotme ka dalë bllof gjatë vizitës së tij në Rusi.
Gjatë konferencës për shtyp, Rama dështoi si ministër i Jashtëm, pasi nuk kishte asnjë dijeni mbi marrëveshjen e vitit 2004 mes Shqipërisë dhe Rusisë.
Rama u korrigjua sy për sy nga Lavrov, i cili është një ndër diplomatët më me përvojë në arenën ndërkombëtare. Ai i kujtoi kryeministrit shqiptar se traktati i miqësisë dhe bashkëpunimit i nënshkruar, nuk ishte ratifikuar nga pala shqiptare.
Por, Edi Rama zgjodhi si përgjigje të sulmonte sërish Lulzim Bashën, pa e ditur se në 2004 ministër i jashtëm ka qenë Kastriot Islami, kurse PD ishte në opozitë.
“Po ka pasur një marrëveshje të nënshkruar mes jush dhe udhëheqësit të sotëm të opozitës, sepse ka qenë Ministër i Jashtëm i asaj kohe, por më duhet t’i mbetem parimit që diçka që është nënshkruar nga qeveria e mëparshme natyrisht nuk është se nuk duhet pranuar nga qeveria aktuale. Kur të kthehem në vend do ta shoh me kujdes dhe do t’ju dëshmoj që unë them çfarë bëj dhe bëj çfarë them”, tha Rama.
