Deputeti demokrat Gert Bogdani në Shih Programin sqaron se përse ndryshoi qëndrimi i PD-së brenda pak orësh në lidhje me “çështjen Ksera”
Gert Bogdani, kur u votua për herë të parë si deputet, doli nga një lloj votimi i drejtpërdrejtë, pak a shumë si listat e hapura të propozuar së fundmi nga Lëvizja Socialiste për Integrim. Kjo është arsyeja që tani ai mbështet idenë e listave të hapura dhe uron që selia blu të vendosë që të pranojë propozimin e bërë së fundmi publikisht nga Meta. Në një intervistë për Shih Programin, Bogdani pohon se për propozimin e ish-aleatit të demokratëve nuk ka ende një qëndrim zyrtar, megjithse sipas tij, për këtë propozim është diskutuar shumë edhe brenda PD-së. Për mungesën e reagimit të fortë opozitar gjatë janarit, ashtu siç edhe kishte premtuar kryedemokrati Basha, Gert Bogdani e ka një justifikim jo të parëndësishëm.
Reforma në drejtësi dhe dëshira e opozitës për t’ia bërë jetën “purgator” e jo “ferr” mazhorancës, duket se ka mbajtur opozitën “nën frena”, për të mos dalë në rrugë në protesta apo arrestime popullore, siç deklaroi publikisht Basha në fund të vitit të kaluar. Sidoqoftë Bogdani thotë se janë kthyer në kuaj beteje akuzat e përditëshme ndaj ministrave të qeverisë Rama-Meta. Selia blu, nuk ndalon vetëm tek akuzat ndaj Tahirit, Beqajt apo Ahmetajt, por tashmë listës i janë shtuar dhe akuzat me koncensionet e shumëpërfolura se janë dhënë, apo se mund të jepen, tek gjendja e rënduar ekonomike, tek rritja e numrit te azilkërkuesve, apo dhe e shqiptarëve që të ardhmen e shikojnë vetëm mijëra kilometra larg atdheut. Ai thotë se PD-ja do të vijë në pushtet vetëm kur të jetë e fortë vetë dhe forcë frymëzuese për popullin. Ndërsa për ata kritizerë publikë të Bashës brenda partisë, të cilët e cilësojnë atë si një lider jofrymëzues, ai thotë se ata vetë kanë kohë që nuk frymëzojnë.
Lidhur me një fushatë takimesh që po zhvillon kryesisht gjatë fundjavave sekretarja për marrëdhëniet me publikun, Grida Duma, deputeti Bogdani deklaron se ajo nuk është pjesë e një fushate të Dumës brenda Partisë Demokratike. Ish-drejtuesi i FRPD, deklaroi se ai nuk ka informacion nëse ka apo do të ketë një fushatë të mundshme per të zgjedhur drejtuese të forumit të gruas demokrate, kur u pyet se mos ishte ky qëllimi i fushatës së saj të brendshme.
Ndërsa deklaratat e ndryshme në thelb të Ristanit dhe Berishës lidhur me çështjen Ksera, deputeti i kryeqytetit, nuk i shikon si një ndryshim kursi, por si plotësuese të njëra-tjetrës. Ai justifikon selinë blu, se mëngjesin e së shtunës bëri një deklaratë “pa ngjyrë”, ku iu dha mbështetje luftës kundër korrupsionit, ndoshta dhe për shkak të mungesës së informacionit që më pas u bë publik nga avokati mbrojtës i ish-ministrit Ksera, që ai nuk ishte marrë kurrë në pyetje në lidhje me kallëzimin ndaj tij.
Bogdani nuk e mohoi, informacionin e publikuar nga 27.al se pas deklaratës së ish-kryetarit Berisha ka patur dhe një mbledhje të thirrur nga kreu aktual i PD-së me kryesinë e grupit parlamentar ku është kërkuar unifikimi i qëndrimit me Berishën në lidhje me cilësimin e arrestimit të ish-ministrit minoritar demokrat, si një arrestim politik.
Ndër shqetësimet e ngritura gjatë intervistës nga deputeti Gerti Bogdani ishte dhe fakti i mosnxjerrjes nga sirtarët të draftit të ngritjes së Byrosë Kombëtare të Hetimit. Sipas ligjvënësit demokrat, tashmë ky draft i hartuar nën syrin e amerikanëve nuk i leverdis më shefit të ekzekutvit dhe njerëzve të tij, ndaj “fle derisa t’i vijë veza për të dalë” nëpër sirtarë.
