Nis “skicimi” i Presidentit të dhjetë të Republikës. Ndërsa pritet që Kuvendi ta zgjedhë në harkun kohor 28 mars deri më 2 maj në pesë raunde, shumica ka nisur të shoshisë se cilat mund të jenë kandidatura për të qenë presidenti i radhës.
I ftuar në emisionin “Debati në Channel One”, të gazetarit Roland Qafoku, për të bërë analizën e punës katër vjeçare të tij, ministri për Çështjet Vendore, Bledi Çuçi ka thënë se nuk ka asnjë shans që kandidati të jetë një emër i dalë nga Partia Demokratike.
“Nuk mund të them ende se cilët do jenë kandidatët, por jam i sigurtë se vetëm nga PD nuk mund ta dalë Presidenti që do të zgjidhet së shpejti.”
Kështu është shprehur Çuçi duke shuar zërat e një marrëveshje me kundërshtarët politikë. Ai shtoi më tej se PS nuk mund të lejojë që ky president të zgjidhet si figurë e dalë nga PD, duke i shtuar kësaj edhe faktin që këtë mundësi për të marrë një mandat të dytë nuk e ka as presidenti aktual Bujar Nishani.
“Kurrsesi Nishani nuk mund të jetë president në një mandat të dytë”, ngulmoi Çuçi.
Deri tani emrat e hedhur si kandidatë të mundshëm për President të Republikës janë Ilir Meta, Mimi Kodheli dhe Valentina Leskaj. Por, asnjë prej tyre nuk mund të quhet kandidaturë zyrtare.
Në historinë e shtetit shqiptar nga Ahmet Zogu te Bujar Nishani janë 9 presidentë. Ndërkohë që pas rrëzimit të sistemit komunist e deri më sot, nga 6 të zgjedhur, 4 prej tyre kanë ardhur si kandidatura nga e djathta (Sali Berisha, Alfred Moisiu, Bamir Topi, Bujar Nishani) dhe vetëm 2 janë presidentë kanë qenë kandidatura të së majtës (Ramiz Alia, Rexhep Meidani).
