Kreu i Partisë Demokratike, Lulzim Basha e ka cilësuar si një farsë përurimin e Murit të Kujtesës në Ministrinë e Brendshme nga kryeministri Rama.
Lulzim Basha ka deklaruar se, të gjalët dhe të rënët në detyrë respektohen duke luftuar krimin, trafikantët dhe drogën.
“Trupa e policisë dhe kujtimi i të rënëve nëpërkëmben e përdhosen çdo ditë nga një ministër i lidhur me bandat e trafikut të drogës në vend, nga një ministër që makinën e tij private e kthen në narkotaksi për Habilajt, nga një ministër që mbajti Shullazin mbi ligjin për 3 vjet derisa ndërhynë partnerët, nga një ministër që prish hetimet për trafikantët duke djegur provat në laborator e duke zbuluar hetimet në media për llogari të krimit”, është shprehur Basha.
Sipas Kreut Demokrat, të njëjtën nëpërkëmbje i bën policisë edhe kryeministri, i cili “futi në Parlament trafikantë e tutorë prostitutash, vrasës e njerëz me precedentë penalë”.
“Nga një kryeministër që fshehu urdhërin e ekstradimit për vrasësin e komisar Dritan Lamajt, që i ofroi atij arratinë, shpëtimin nga drejtësia. Nga një kryeministër që mban Eskobarin e Ballkanit, që pasi e ka bërë drejtor të transportit e mbron edhe nga aksioni ndërkombëtar për kapjen e tij. Një kryeministër që ka krijuar kartelin më të rrezikshëm të drogës në Europë, që ndërton edhe pista avionësh për narkotrafikun”, ka vijuar Basha.
Basha akuzon kryeministrin se, “krimin e ka veshur me pushtet dhe pushtetin me krim”.
