Në një deklaratë për mediat mbrëmjen e sotme, Kreu i Partisë Demokratike Lulzim Basha u shpreh se ndryshimi i thellë politik dhe ekonomik do të jetë prioritet i opozitës.
Basha ritheksoi se nuk do të ketë zgjedhje me Edi Ramën, pasi 85% e shqiptarëve duan ndryshim dhe kjo është e vetmja vlerë e asaj që ndodhi dje.
Sa i takon votimeve të qershorit, Basha u shpreh se ata e theksuan më tej krizën politike.
“Që nga mitingu i 16 shkurtit kemi ardhur duke u rritur në numër dhe duke u bërë më të vendosur për kauzën tonë të drejtë e legjitime. Që nga ajo ditë na janë bashkuar qindra mijëra qytetarë dyshues deri atëherë nëse rruga jonë ishte e duhura. U bashkuan jo për politikë por sepse e duan Shqipërinë, duan të ndërtojnë jetën dhe të rrisin fëmijët në këtë vend. 85% e shqiptarëve duan ndryshim. Kjo është e vetmja vlerë e asaj që ndodhi dje. Gjithçka tjetër është një farsë e paligjshme antikushtetuese dhe provokim kriminal për shqiptarët që nuk ranë pre e tij. Këtë e di shumë mirë dhe Edi Rama”, tha Basha.
