“Më vjen keq për një koleg timin që ka një sallë që nuk do ta dëgjojë. Por nuk duhet ti fyejmë sallat prej të cilave zgjidhemi dhe duhet të ndajmë mirë hallet me dëshirën për karrige”
Incidenti me Ben Blushin në Elbasan është një problem lokal që do të zgjidhet nga asambleja e Elbasanit. Kështu i ka dhënë zgjidhje Gramoz Ruçi, kërkesës së dy deputeteve të PS-së, Arta Dade e Mimoza Hafizi, për të analizuar dhunën ndaj Ben Blushit në Elbasan të pretmen e shkuar (militantët e PS-së sulmuan Blushin në një aktivitet partiak që organizohej nga Rama). Këtë e konfirmoi deputeti soialist Taulant Balla.
“Kryetari i grupit, Gramoz Ruci vlerësoi se kjo cështje është një kompetencë e asamblesë socialiste të Elbasanit. Ajo që mori më shumë vëmëndje dhe diskutim ishte shqetësimi i grupit parlamentar nga disa deklarata të Ben Blushit për kriminelë në PS”, tha Balla.
Balla tha për mediat se në mbledhjen e sotme të grupit parlamentar kishte pasur debate të forta por ato lidheshin me shqetësimet e deputetëve për sulmet që sipas Ballës, ka ndërmarrë deputeti Ben Blushi ndaj PS-së.
“Blushit iu kërkua në mënyrë të përsëritur se cilët janë këta deputetët me precedent kriminalë. Blushi nuk tha ndonjë emër madje tha se grupi nuk ka asnjë. PS e ka mbështetur procesin e dekriminalizmit. Gjithë kjo sintoni mes Blushit dhe Shqupit është për të ardhur keq.
Më vjen keq për një koleg timin që ka një sallë që nuk do ta dëgjojë. Së pari nuk duhet ti fyejmë sallat prej të cilave zgjidhemi dhe duhet të ndajmë mirë hallet me dëshirën për karrige. PS është parti shumë demokratike, kjo u bë dhe do të vazhdojë edhe në Elbasan”, tha Balla.
