Policia e Tiranës ka dhënë detajet e para në lidhje me atë që ka ndodhur në tubimin e hapjes së fushatës nga ana e Partisë Demokratike, ku më shumë se 50 persona, mes tyre dhe kreu i PD-së Lulzim Basha, kanë përfunduar në spital me simptoma të njëjta.
Deklarata zyrtare e policisë:
Në datë 28.05.2017, rreth orës 04:00 të mëngjesit në Q.S.U.T., janë paraqitur për ndihmë mjekësore rreth 50 persona me simptoma të ngjashme, kryesisht djegie në sy dhe skuqje lëkure në pjesët e sipërme të trupit.
Nga verifikimet paraprake rezulton se këta persona kanë qenë pjesëmarrës në aktivitetin e zhvilluar nga Partia Demokratike, mbajtur në orën 19:00 të datës 27 maj, zhvilluar në Bulevardin “Dëshmorët e Kombit” në Tiranë.
Pasi janë mjekuar të gjithë persona janë larguar për në banesë, veç 3 prej tyre që kane patur më tepër shqetësime dhe po mbahen nën kujdesin e mjekëve në spital.
Menjëherë sapo ka marrë njoftim, nën drejtimin e Prokurorisë së Tiranes është ngritur grupi hetimor me ekspertë nga Policia e Shtetit, Garda e Republikës, struktura të specializuara të Forcave te Armatosura etj.
Ndërkohë po kryhen gjithë ekzaminimet e nevojshme për të përcaktuar shkakun që provokoi simptomat si dhe zbardhjen e plote te rrethanave te ngjarjes.
