Ambasadori i SHBA-së e quajti të rëndë situatën kriminale në Shqipëri dhe se shqiptarët janë të ngopur me kriminelët dhe politikën.
Në aktivitetin e organizuar nga qendra Marshall në Tiranë Donald Lu përmendi rastin e Emiljano Shullazit, si shembulli i njeriut për shumë vite i akuzuar për krime, trafik droge por i arrestuar vetëm kohët e fundit.
Duke marrë si shembull dhe rastin Al Kapones në SHBA, Donald Lu paralajmëroi se për të gjithë kriminelët që do t’i bashkohen politikës në Shqipëri do të futen drejt e në burg sapo krimet e tyre të dalin në dritë.
Donald Lu: Donald Lu: Shqipëria ka nivelin më të ulët të dënimit të krimeve të rënda në Europë dhe problem është mosndëshkueshmëria, pasi bosët e krimit nuk dënohen për shkak të lidhjeve që kanë me njerëzit e drejtësisë. Edhe ne në SHBA e kemi patur këtë problem në kohën e Al Kapones. Kur më në fund u arrrestua, ai kishte një pasuri prej qindra miliona dollarësh të përfituar nga prostitucioni, kumari dhe kontrabanda. Por, ai ja kishte hedhur sistemit të drejtësisë falë lidhjeve që kishte me policinë, drejtësinë dhe bashkinë.
Edhe në Shqipëri situata është serioze, por unë besoj se reforma në drejtësi dhe procesi i dekriminalizimit do të ndihmojë për përmirësuar problemin e mosndëshkueshmërisë dhe të zhdukë lidhjet me politikën. Shqiptarët janë të ngopur me kriminelët dhe politikën. Përpjekjet e suksesshme për të hequr vrasësit, trafikantët dhe përdhunuesit nga parlamenti dhe organet vendore do të kenë një efekt në uljen e mosndëshkueshmërisë për bosët e krimit. Është ky edhe një paralajmërim për të gjithë kriminelët e tjerë që do t’i bashkohen politikës, pasi krimet e tyre do të dalin në dritë të diellit dhe ata do të futen direkt në burg.
