Nga Enkel Demi
Yuri Kim me gjasë do jetë ndjerë keq, tek mësoi se Edi Rama nuk e ka fare në plan të heqë dorë nga banditët e tij. Në kohët, kur ajo hynte dhe dilte në zyrën e këtij njeriu, shumëkush foli për cubat që kriminalizuan zgjedhjet e mëparshme. Dolën përgjime, në të cilat ai vetë fliste me ta dhe kërkonte numra, në mënyrë që të fitonte timonin, tepsinë, kusinë, sahanin, ullukun apo hot dog-un e pushtetit. Ata që guxuan të flasin, të publikojnë i mëshuan fort idesë që “drejtësia e re” ka dështuar, përderisa nuk lëvizi as gishtin për ta vënë ujin në zjarr.
Nga ana e saj Yuri Kim doli dhe tha se ka ca njerëz që duan të pengojnë Reformën në Drejtësi. Edi Rama i përdori këto të thëna në foltoren e Kuvendit duke shpallur se kishte me vete Amerikën, mjaft të ndiqnim deklaratat e Yuri Kim. Në sallonet e Rilindjes kryeministri shpotiste hapur mprehtësinë e gruas së Rrugës së Elbasanit. Ai përdorte dhe përdor epitete fyes për inteligjencën e zonjës, e cila u bë hasëm me tërë botën që të justifikonte përdhosjen që ai i bëri Marrëveshjes së 5 Qershorit, ku Edi Rama mori nëpër këmbë jo vetëm “besën” amerikane, por mbi të gjitha vullnetin politik të Sekretarit të Shtetit Mike Pompeo. Një udhëheqës i një vendi sa një majë thoi talli menderen me garancitë amerikane dhe me vetë Sekretarin e Shtetit. Por, në këtë provincë të largët gjithçka shkon dhe harrohet.
Së fundmi, zonja Yuri Kim për gjithë këto të pabëra kërkon një lëshim; një listë zgjedhore të “pastër” nga banditët. Edi Rama, jo vetëm nuk e ka ndër mend, por nuk ka se si. Për këtë arsye tha se nuk do ta kthejë partinë në rajon policie dhe as në sallë torturash.
E para, i shkoi mendja tek policia, sepse kandidatët e tij do të ndjeheshin familjarë vetëm në këtë vend dhe jo në Kuvend.
E dyta, i shkoi mendja tek oda e torturës, se kriminelët vetëm këtë gjuhë dinë të përdorin për të arritur një marrëveshje.
E treta, ai nuk heq dot dorë nga banditët, pasi megjithë ndryshimet që i bëri ligjit zgjedhor nën hundën e Yuri Kim dhe Luigjit të shkretë, prapë ata janë e vetmja shpresë që t’ia marrin votat me dhunë, se vota më për të nuk ka.
E katërta, nuk ka se si, pasi po hoqi nga listat cubat duhet të thërrasë në to socialistët. Ka kohë që tek rilindja nuk ka më socialistë, pasi dhe ata që ruajti qenë vetëm banditët e PS-së si Gramoz Ruçi apo Spartak Braho.
Prandaj, zonjës Yuri Kim i mbetet veç të gëlltisë fyerjen dhe talljen që i bënë dhe po i bëjnë. Ndjesia i ngjan hangover-it, sepse të bëhesh esëll duhet të vuash, duhet të përjetosh dhimbje, të cilat shtohen akoma më shumë, pasi njerëzit që sot po i dalin në krah të shkretës Yuri Kim janë pikërisht ata që dikur “pengonin” reformën në drejtësi.
