Në një bisedë me gazetarin Baton Haxhiu në Klan Kosova, mbrëmjen e djeshme, kryeministri Rama ka komentuar edhe efektin e tarifës 100% për mallrat serbe në Kosovë, që sipas tij kjo bëri që të humbasë Kosova dhe të fitojë Serbia.
“Kosova e pagoi më shtrenjtë tarifën 100%, e pagoi më shtrenjtë sesa Serbia. Serbia pagoi pjesën e vet financiare, por politikisht Serbia fitoi nga tarifa, sepse u shit si një viktimë e një politike agresive tarifore, ndërkohë që tarifa 100% ishte fantastike si instrument për të fituar dicka, por jo si qëllim për të bllokuar gjithë planetin, dhe për të kënduar si gjeli majë plehut në Prishtinë”, tha Rama.
Rama tha se Kosovës i erdhi një mundësi e artë në Berlin për ti hapur rrugë lëvizjes së lirë. Macron sipas tij doli garant ta bënte këtë gjë, vetëm nëse Kosova pezullonte për 4 muaj taksën 100% për Serbinë, por Kosova, tha Rama, nuk e përdori këtë mundësi si instrument por si qëllim.
“Ishte një mundësi, dhe ajo erdhi e artë në Berlin. Presidenti Emmanuel Macron i tha Ramush Haradinajt: “4 muaj, – më jep mundësinë mua dhe Angela Merkelit, mos e hiq tarifën vetëm pezulloje 4 muaj, dhe unë deklaroj se për 4 muaj të heq veton për liberalizimin e vizave”, e ku kishte më mirë? Sot do lëviznit të lirë në të gjithë Europën nëse tarifa do ishte përdorur si instrument e jo qëllim. Duke u përdorur si qëllim fitoi Serbia, humbi Kosova, se kështu është kur bëhet politikë me emocione afatshkurtra, kështu është kur bëhet politikë për vota, dhe për të treguar nëpër katundet tona se kush është më patriot se tjetri, dhe kështu është kur bëhet politikë në emër të syve të Kosovës”, deklaroi Rama.
