Nga Stefano Giantin
Protesta dhe zemërim në rritje, jo vetëm në botën e intelektualëve por edhe në arenën politike. Kjo është atmosfera që prej një muaji përshkon Tiranën, kryeqytetin shqiptar që prej vitesh po ndryshon për mirë.
Tirana, veç ndërtesave të rinovuara dhe të reja ka edhe ndërtesa të vjetra si Teatri Kombëtar. Ky teatër është projektuar në vitin 1938 nga arkitekt italian Giulio Berte, dhe prej vitit 1947 ka ekzistuar në zemër të qytetit.
I ndërtuar për klubin italo-shqiptar dhe kinemanë “Savoia”, u transformua më vonë në teatrin më të rëndësishmëm në vendin e shqiponjave. Por teatri dhe trashëgimia e tij mund të jenë jetëshkurtër. Këtë të enjte artistë, intelektualë dhe qytetarë protestuan para Parlamentit kundër shembjes së teatrit, me pankarta që shkruanin “Unë jam teatri”.
Artistët janë kundër formulës së partneritetit publik-privat, që do ta zëvendësojë teatrin me një godinë të re të projektuar nga Bjarke Ingels. Sipas tyre, kompania që do të ndërtojë teatrin e ri do të marrë leje që në këtë territor të ngrejë një kullë 20 katëshe.
Ministrja e Kulturës, Mirela Kumbaro e arsyeton shembjen me faktin se teatri është në gjendje shumë të keqe, kjo për shkak edhe të materialeve që janë përdorur kur është ndërtuar fillimisht. Ky arsyetim ka bindur disa, por sigurisht jo ata mijëra njerëz që kanë firmosur një peticion kundër shembjes.
Nuk e ka bindur as aktorin Bujar Asqeriu, i cili sipas Reuters tha: “ Qeveria duhet të mendojë dy herë për shkatërrimin e teatrit, kulturës dhe historisë sonë”.
Opozita gjithashtu është rreshtuar në krahun e aktorëve, duke e cilësuar kryeministrin Rama “lakmitar për para” që dëshiron të shfrytëzojë pronën publike për interesat e tij.
“Ky është një mashtrim që do të çojë në shkatërrimin e një ndërtese historike të trashëgimisë kulturore”, është shprehur deputetja Albana Vokshi. Por ankesat, protestat dhe kundërshtitë nuk kanë ndalur shumicën qeverisëse që të japë dritën jeshile për prishjen e teatrit. Por lufta është vetëm në fillim.
