Në prag të miqësores së të shtunës në Vienë, kujt tjetër mund t’i referohesh veçse Ronald Gërçaliut. Dhe e përditshmja austriake “APA” i ka kushtuar një vend të dukshëm, me motivin se futbollisti aktual i Tiranës, në vitin Euro 2008 ka qenë në fushë me uniformën e Austrisë. Gërçaliu, atëherë futbollist i Shturmit të Gracit ka debutuar pikërisht në një ndeshje kundër Kroacisë. “Atëherë isha shumë i ri – thotë pasardhësi i Metanëve – dhe nuk mendoj se kam gabuar për zgjedhjen që bëra. Tashmë jam 30 vjeç dhe do të më duhet ta ndjek takimin nga shkallët e stadiumit, ndërkohë qw jam i dyzuar për të bërë tifo, pasi i njoh të dyja përfaqësueset”. Veç kësaj, Ronaldi është i martuar me një grua austriake dhe ka dy fëmijë, ndërsa që familja e tij jeton në Insbruk.
Sipas Gërçaliut, futbollistët e ish-skuadrës së tij janë disi më në avantazh, pasi kanë një skuadër që po kalon një periudhë të shkëlqyer, por sidoqoftë, Shqipëria e tanishme ka ndryshuar mjaftueshëm sa për të bërë rezistencë, apo edhe për të shkaktuar ndonjë të papritur. “Vë re që disa nga lojtarwt shqiptarë nuk janë stabël në skuadrat e tyre, kurse austriakët zgjedhje e parë kudo që luajnë. Ndërsa De Biazi është një hero, pasi ka bërë një punë të madhe me skuadrën dhe ndoshta është i ngjashëm me Marcel Koler të Austrisë”, përfundon “austriaku” i lindur në Tiranë.
