Dikush ia ka prishur qejfin trajnerit të kombëtares tonë, Xhani de Biazi, aq sa në konferencën për shtyp të disa minutave më parë, shpesh herë u tregua arrogant, apo e deformonte mimikën e fytyrës, për të treguar se në përgjithësi nuk i pëlqente cilësia e pyetjeve. Dhe gjëmën që nuk pamë dot një de Biazi të qeshur na e bëri drejtori i klubit Partizani, i cili është shprehur gjatë javës së kaluar, që trajneri duhet të qëndrojë më shumë në Shqipëri dhe të vëzhgojë nga afër disa lojtarë të kampionatit tonë në prag të listës finale. Dhe kuptohet që Dervishi i sygjeronte më shumë futbollistë të skuadrës së tij, pasi ata i intresojnë. Ndërsa mister Xhani i bëri menjëherë me dije se edhe në shtëpinë e tij në Itali kishte një dekoder shqiptar që ia kishte bërë të mundur të ndiqte “live” ndeshjen Partizani – Skënderbeu, e kishte riparë atë takim, madje po në television nga e njëta dritare kishte ndjekur edhe takimin e Champions, Bajern Mynih – Juventus. Pra nuk vij në Tiranë vetëm për të marrë çmime, por sa herë që presidenti Duka më thotë se duhet të jem. Dhe për t’i shkuar deri në fund reprikës, pyetje së një gazetari (për të çtensionuar situatën), nëse e kishte ndjekur dje derbin e Italisë iu përgjigj prerë: Jo, nuk pata mundësi isha duke parë Tirana – Kukësi. Pra, de Biazi tentoi t’I bënte të ditur shef Dervishit, se në kohët moderne nuk ka arsye të lëvizësh shumë shpesh për të ndjekur një futbollist, madje si shembull përdori një shprehje shumë të gjetur: “Nuk duhet të kesh lindur në Romën e lashtë, për të ditur latinisht”. Më pas, tekniku sqaroi se është ai që ka ekskluzivitetin për të bërë zgjedhjen e vështirë, të thirresë ose jo futbollistë të veçantë dhe do ta ushtrojë të drejtën e tij. “Nëse dikush nuk do të jetë në finalet e Francës, kjo nuk vjen nga antipatia ime për të, por sepse besoj, se ata që kam zgjedhur i shërbejnë më mirë skuadrës”, duke iu referuar lënies jashtë listës të Salihit, apo edhe të Alban Mehës. Po ashtu u konfirmuar, që Rashica, i cili po kalon një periudhë shumë të mirë tek Viteshe do të bashkohet me grupin, si edhe Manaj e Latifi, të cilët fillimisht do të jenë në dispozicion të Redi Jupit për përfaqësuesen U-21. Dhe në fund çfarë duhet të presim nga Shqipëria e Euro 2016? “Të jemi një skuadër agresive, pasi vetëm kështu mund të lëmë gjurmë. Unë e di që ne jemi të katërtët në grup për nga vlerësimi, por të fundit ishim edhe në fillim të fazës eleminatore. Të tjerët mund të kenë individualitete, por mund të mos jenë skuadër aq sa ne. Pra futbollistët tanë duhet të japin gjithçka kanë ndaj çdo kundërshtari… duhet t’i hanë me dhëmbë”, ka përfunduar de Biazi, të cilit nuk i doli inati deri në fund të konferencës.
