Mesila Doda: Interes i sinqertë i anëtarësisë, mesazhi ynë shkoi tek ata
Shpëtim Idrizi marr votën e anëtarësisë së PDIU për të vijuar të jetë në krye të saj. Deputetja e kësaj force politike Mesila Doda ka dhënë shifrat paraprake të zgjedhjeve të sotme me parimin “një anëtar një votë”. Sipas saj në votime kanë marrë pjesë 81.5 për qind e anëtarësisë së kësaj partie nga të cilët 19 454 kanë dhënë votë të vlefshme dhe 148 vota kanë dalë të pavlefshme.
Doda tha se është parë një interes i sinqertë i anëtarësisë që sa vjen e rritet duke e kthyer këtë parti në një forcë politike të një formati të madh më të fuqishëm, në një parti kombëtare.
“Momenti i zgjedhjeve ka qenë surprizë, një anëtarësi shumë e interesuar për votimet. Është e qartë se njerëzit e kanë marrë mirë mesazhin që ne përcollëm në çdo qark dhe duket se janë të lodhur edhe nga partitë e mëdha”, deklaroi Doda. Ajo shtoi se PDIU është konfirmuar tashmë si një parti që bën politikë praktike, korrekte, që e mban fjalën e dhënë, ndaj edhe zgjedhësit e kanë bërë diferencën.
“PDIU po bën një politikë ndryshe dhe po u qëndron fort kauzave të saj si bashkimi kombëtar, Çështja Çame dhe dekomunistizimi”, theksoi Doda. Sipas saj PDIU me interes të veçantë ka ndjekur dhe po ndjek edhe zhvillimet ekonomike të vendit, duke përmendur si ilustrim të kësaj interpelancën me ministrin e Transporteve për Rrugën e Arbërit.
Në aspektin politik Mesila Doda tha se PDIU po punon fort që sistemi me vetëm dy parti të mëdha politike të marrë fund, duke i hapur rrugë një sistemi demokratik me shumë alternativa për zgjedhësit.
