Pas dështimit të raundit të parë për zgjedhjen e Presidentit të Ri, kryeministri Edi Rama ka deklaruar se mazhoranca shpreson që opozita, e cila ka bojkotuar Parlamentin, të kthehet në rrugën e arsyes.
Rama tha se votat në Kuvend për ta miratuar nuk mungojnë, por se sipas tij mazhoranca ka ende durimin për të zgjedhur një kryetar shteti të paanshëm.
“Të gjejmë konsensus rreth një figure sa më përfaqësuese. Ne do të presim, më mirë një president i duhur dhe i pranuar”, ka thënë Rama.
Kryeministri tha se mazhoranca i ka lënë të gjitha hapësirat e nevojshme Partisë Demokratike, por se këta të fundit nuk kanë paraqitur një kandidat ndërsa mazhoranca do të bëjë të gjitha përpjekjet për t’u dhënë shqiptarëve atë që meritojnë.
“Bota opozitare është një koncept që po zgjerohet. Opozita e parlamentit të ri do jetë më sfiduese, se sa kjo opozitë. Ne nuk kemi asnjë paragjykim dhe nuk kemi asnjë kufi të paravendosur. Duam t’i japim Shqipërisë një president dinjitoz që të qëndrojë sa më mbi palët aq sa e bën Shqipëria të mundur, nuk po e presim të vijë nga materniteti. Ama të jetë një President që të ketë autoritetin që t’u bëjë një telefon të gjithëve për të zgjidhur një situatë”, – deklaroi kryeministri.
