Nga Edlira Gjoni
Mirë që jemi të dorëzuar e të paaftë në arenën ndërkombëtare, po edhe pazaret i marrim vesh të fundit. Nga mediat “dashamirëse” fqinje, se tonat flenë gjumë.
Çorbë anti-shqiptare po gatuan ministri i Jashtëm, teksa të gjithë merren me teatrin në Tiranë. Ne me teatro, gazetat fqinje raportojnë për shfaqjen me dyer të mbyllura andej kufirit.
Sipas tyre, duhet të shtrojmë tapet për një a dy mijë shqiptarët që e quajnë veten pakicë në Jug, ndërkohë që 400 mijë emigrantët tanë stigmatizohen rregullisht që nga viti 1990.
Të heqim dorë nga deti, nga toka ku ka varre të kujtdo që fqinjët u kanë vënë syrin t’i quajnë greke. qershia mbi tortë, “surpriza” shqiptare: vullnetarisht do heqim dorë nga emri Çamëri!!!! Do e fshijmë fare nga këngët, tekstet, bisedat, historitë e të moshuarve. Se nga ligjërimi publik e historia zyrtare, po e po.
Do ulen diplomatët tanë mendje-ndritur, së bashku me tutorët grekë në një krah e turq të krahun tjetër, të rishkruajnë historinë. Siç nuk do ketë më “ofendime” për Perandorinë Osmane që “nuk e ka pushtuar, por ndihmuar Shqipërinë”, do kemi edhe tekste të reja historie ku jo masakra e genocid çam që nuk do përmenden, po as termi Çamëri nuk do gjendet më askund. Me të shkruar jo e jo, po as në gojë mos guxoni ta zini si fjalë, se mërzitet Greqia. E po u mërzit, përbën provokim diplomatik e incident ndërkombëtar.
Ja që po na shesin edhe identitetin, e jo më ca metra tokë brenda vetes për Teatrin. Si ta kthejmë Rilindjen në shina, para se t’i nxjerrë themelin edhe Shqipërisë, edhe shqiptarisë?
