Kryeministri i Serbisë Aleksandër Vuçiç ka shprehur dëshirën për të krijuar një lidhje ekonomike e tregtare të ish-shteteve të Jugosllavisë dhe të Shqipërisë.
Gjatë një interviste të dhënë për portalin Amerikan “Politico”, sipas Vuçiç kjo gjë do të rriste ekonominë e këtyre shteteve dhe do të bënte të mundur përforcimin e bashkëpunimit rajonal.
Vuçiç tha se nëse të tjerët pajtohen me planin e tij, do të krijohej një treg nga 20 milionë banorë, gjë që sipas tij do të tërhiqte vëmendjen e shumë investitorëve të huaj.
I pyetur nëse dëshiron të krijojë një Jugosllavi të re, Vuçiç është përgjigjur se bëhet fjalë për “Jugosllavinë e vjetër plus Shqipërinë.
Pyetjes se si e mendon një bashkëpunim të tillë duke marrë parasysh tensionet aktuale ndërmjet fqinjëve, Vuçiç ka thënë se Tito ka pasur sukses.
Duke argumentuar mbi rreziqet në Ballkan, Vuçiç ka thënë se “çfarëdo që të ndodhë në Kosovë, ajo është gjithmonë ndërmjet serbëve e shqiptarëve”.
