Kryebashkiaku i Bulqizës, Lefter Alla ka njoftuar se do të depozitojë padi penale për publikimin e videos nga Artan Hoxha në Abc News duke konsumuar lëndë narkotike në një ambient publik.
Përmes një postimi në Facebook, kryebashkiaku i Bulqizës do të padisë Ervin Salianjin si edhe “një televizion lokal”. Alla thotë se e dinte për videon që para një viti, por nuk kishte besuar se do t’i shkaktonte probleme pasi besonte tek drejtësia.
Ndërkohë, Prokuroria e Posaçme Antikorrupsion ka nisur tashmë hetimin për kryebashkiakun e Bulqizës Lefter Alla pas publikimit të videos nga gazetari Artan Hoxha në Abc News duke konsumuar lëndë narkotike në ambiente publike. Mësohet se nëse gjendet fajtor, Alla mund të dënohet nga 5 deri në 10 vite burg.
Postimi i plotë i Lefter Allës
Dua të informoj opinion publik të Bulqizës dhe të gjithë Shqipërisë, me të drejtë të shokuar nga një video-montazh të publikuar në bashkëpunim nga Partia Demokratike dhe një televizion lokal, se sot jam nisur drejt Tiranës ku do të depozitoj një padi në ngarkim të shtetasit Ervin Salianji, një person me aktivitet përsëritës kriminal për situata të ngjashme, referuar organeve të drejtësisë shqiptare.
Dua të sqaroj gjithashtu se ekzistenca e një video-montazhi më është bërë me dije prej rreth një viti, por gjithmonë kam besuar dhe besoj se duhet të jetë drejtësia ajo që ta hetojë dhe ta zbardhë.
Prandaj deklaroj se unë do të pres zbardhjen e çdo vepre penale nga drejtësia.
Kushdo që më akuzon mua të presë veprimet e Prokurorisë dhe vendimin përkatës të Gjykatës.
