Kryetari i Bashkisë së Tiranës gjatë bisedës në Shih Programin në TVSH foli për planet e Bashkisë për ndryshimin e pamjes së kryeqytetit. Pasi komentoi protestat tek Liqeni kundër ndërtimit të parkut të lojërave për fëmijë, duke i cilësuar si të politizuara dhe të paarsyeshme, Veliaj u ndal dhe tek pallati 13 katësh që po ndërtohet në hyrje të Liqenit tek Rruga e Elbasanit, si dhe për rindërtimin e Sheshit Skënderbej.
“S’ka ndërtime të reja tek Liqeni. Ai ndërtim, për të cilin ju flisni është në tokë private e ndarë me një rrugë nga liqeni. Në atë drejtim janë 8 pallate që janë pas tij të ndërtuara shumë më afër liqenit. Për ligjshmërinë e ndërtimit s’kam çfarë të them se kryetari që u largua e la në fuqi një plan”, tha Veliaj. Ai theksoi se Bashkia nën drejtimin e tij ka një plan urgjent për të përcaktuar një herë e mirë kufinjtë e Liqenit Artificial për të mos lejuar as xhepa parkingjesh apo ndërtime të tjera në të ardhmen.
Ai premtoi dhe një herë se sa të jetë kryetar Bashkie nuk do të ketë asnjë lloj ndërtimi brenda Liqenit, përveç infrastrukturës për ta bërë më të aksesueshëm atë.
Ndërkohë zbuloi planin për të kthyer edhe një herë në shesh ndërtimi qendrën e Tiranës, që ka qenë një mollë sherri mes së djathtës e së majtës para se të largohej Edi Rama nga kryetar Bashkie në vitin 2011. Lulzim Basha që erdhi pas tij i mbylli punimet e lëna hapur në shesh dhe e ktheu atë në formën që ka sot, por Veliaj pranoi mbrëmë se së shpejti kjo pamje do të ndryshojë një herë e përgjithmonë.
“Sapo të mbarojë unaza e vogël, Sheshi Skënderbej do t’i nënshtrohet një projekti fantastik për t’u kthyer në një kryeqendër të shqiptarëve. Do të ketë gurë dhe pllaka nga e gjithë Shqipëria, pemë dhe bimë shqiptare nga më autoktonët. Nga çdo cep i ri i vendit do të ketë gjithçka”, tha ndër të tjera ai. Veliaj e cilësoi këtë projekt së bashku me parkingjet nëntokësore si dy lëvizje që mund të hasin në kundërshtim apo “histeri”, por që janë projekte vizionare që do ta ndryshojnë një herë e mirë Tiranën duke e bërë një qytet modern.
Më tej Veliaj tha se së shpejti do të nisë investimi në ndërtimin e Parkut të Kasharit, Farkës dhe Vaqarrit, i cili shpreson të mbarojnë deri në fund të mandatit.
/27.al/
