Ministri i Drejtësisë, Petrit Vasili ka ngritur shqetësimin mbi rolin dhe funksionimin e Bordit të Menaxhimit të Operacionit Ndërkombëtar të Monitorimit (ONM), që do të kontrolojë Vetting-un në Shqipëri.
Përmes një letre që i ka dëRguar Presidentit, Kryetarit të Kuvendit, Kryeministrit dhe dy ambasadorëve të SHBA-së dhe të BE-së, Ministri i Drejtësisë deklaron se nuk është vendosur në dijeni për komunikimin e Kryetares së Operacionit Ndërkombëtar të Monitorimit në Shqipëri në datë 7 Shkurt në lidhje me zbatimin e Reformës në Drejtësi dhe rolin e ONM-së.
Më tej Ministri Vasili shprehet se në miratimin e Kushtetutës së re në 21 korrik nuk ka asnjë përcaktim mbi ngritjen e një Bordi të Menaxhimit të ONM-së në Shqipëri.
‘Roli i Bordit të Menaxhimit të ONM-së është i paqartë me anëtarë të përhershëm dhe të përkohshëm si edhe përfshirja brenda tij e përfaqësuesve të ambasadave nuk gjejnë mbështetje të Kushtetutë dhe në ligj. Në ONM nuk parashikohet përfshirja e trupave me përbërje politike sikur është Bordi i Operacionit të Monitorimit, si interlokutor mes ekspertëve të ONM-së dhe institucioneve shqiptare. Diskutimi duhet të jetë pjesë e tryezave të nivelit të lartë politik dhe parlamentar për këtë çështje” shkruhet në letrën e Petrit Vasilit.
