20 të vdekur dhe 1015 persona të plagosur. Ky është bilanci i deritanishëm nga tërmeti i fuqishëm që goditi mbrëmjen e sotme pjesën Lindore të Turqisë.
Ministri i Brendshëm Süleyman Soylu pohoi se raportohet për 100 ndërtesa të shkatërruara në Elazig.
Ndërkohë operacionet e shpëtim-kërkimit vijojnë ende, me ministrat e qeverisë që kanë zbarkuar të gjithë në zonën e prekur.
Sipas ministrit të brendshëm turk, në Elazig, qyteti ku ishte edhe epiqendra e tërmetit, 30 persona janë shpallur të zhdukur.
Mbrëmjen e shtunës, Turqia u godit nga një tërmet 6,8 ballë i shkallës Rihter, i cili po vazhdon të pasohet nga dhjetëra pasgoditje të tjera.
Lëkundjet prekën thuajse të gjithë pjesën Lindore të Turqisë, ndërsa janë ndjerë edhe në Siri.
