Një operacion i autoriteteve policore italiane ka çuar gjatë ditës së sotme, në shkatërrimin e një grupi trafikantësh shqiptarë me bazë në Brindizi të Italisë që trafikonin heroinë e kokainë nga Turqia e Hollanda.
Janë ekzekutuar 23 urdhër ndalime; 19 prej tyre nën urdhër arrestimi me burg e 4 në arrest shtëpiak. Arrestimet janë kryer në Brindizi, Shqipëri, Taranto e Kalabri.
Hetimet kanë zbardhur se trafikantët shqiptarë kishte aftësi të trafikonin sasi të mëdha droge nga Turqia e Hollanda e ta tregtonin në tregjet ilegale në Puglia e Reggio Calabria. Hetimet kanë vërtetuar gjithashtu dhe interesin e mafias puglieze Sacra Corona Unita, mbi aferat fitimprurëse të trafikantëve shqiptarë duke pretenduar një pjesë të tyre.
Gjatë fazave të hetimit e deri në ekzekutimin e sotëm të këtij operacioni, janë sekuestruar 57.5 kg kokainë, 20 kg substancë përzierëse për përgatitjen e dozave të drogës, rreth 202 mijë euro cash, 200 gramë heroinë, 2 pistoleta e fishekë.
Guardia di Finanza e Leçes informon se në hetimet e operacionit janë përfshirë 45 persona e urdhri i ndalimit është ekzekutuar për 23 prej tyre. Akuzat ndaj tyre janë “trafik ndërkombëtar droge”, “aktivitet kriminal me metoda mafioze”, “armëmbajtje pa leje” e “riciklim parash nga aktiviteti kriminal.”
2 nga personat e vënë nën hetim janë sinjalizuar tek autoritetet gjyqësore dhe për riciklim parash të pista me investime të në sipërmarrje.
