Taulant Xhaka nuk do ta kursejë të vëllain, Granitin, kur të përballet me të në ndeshjen e Europianit me Zvicrën.
Por, sipas Taulantit Graniti ka për të kënduar himnin kombëtar, sepse atë e ka mësuar qysh i vogël në familje.
“Himni? Babai im ma ka mësuar. Gjithashtu e kam mësuar në shkollën shqipe për 4 vjet. Himnin e dimë të gjithë si familje, edhe Graniti. Graniti brenda vetes do ta këndojë himnin? Besoj që edhe Graniti përpara ndeshjes do ta këndojë himnin shqiptar brenda vetes. Ai ka gjak shqiptari”, ka thënë Taulant Xhaka.
Një tjetër lajm i mirë vjen nga Kombëtarja shqiptare. Portierët e saj, Berisha, Shehi dhe Hoxha janë në formë të shkëlqyer, ndaj të paktën flemë të qetë që rojtarët tanë i kanë shtrënguar saraçineskat e portës tonë.
Ndërkohë, seancat stërvitore vazhdojnë me intesitet, kurse Memushaj e ka braktisur për pak Kombëtaren. Vlonjati është rikthyer në Pescara, ku skuadra e tij luan ndeshjet e play off për të kaluar në Serinë A.
