Pikërisht atje ku dy vite më parë na u sulën si çakejtë, në derbin Partizani – Crvena Zvezda të luajtur dje, serbët u përleshën për të masakruar njëri-tjetrin
Të gjithë i mbajnë mend ato që ndodhën gjatë ndeshjes së Kombëtares tonë në Beograd, ku urrejtja e një morie njerëzish që kishte mbushur shkallët e stadiumit “Partizani” u ndez si në mesjetë dhe në fund u transferua në fushën e lojës, aq sa arbitri anglez, Atkinson, nuk mundi ta vazhdonte më lojën, megjithë dëshirën e madhe që kishte. Por pikërisht në atë qytet, madje në atë stadium, urretja është gjithmonë prezente edhe brenda llojit dhe asnjëherë nuk ka limite.
Pamje nga një prej tribunave të stadiumit “Partizani” gjatë derbit të djeshëm, Partizani – Crvena Zvezda
Derbi i së shtunës, Partizani – Crvena Zvezda u luajt në një atmosferë shumë armiqësore, ndjekur nga tifozë, në masë të maskuar, fishekzjarë jashtë kontrollit, banera fyes dhe flamuj të djegur. Partizani ka arritur një fitore të madhe në të 89’, duke i mundur kryesuesit e Zvezdës me një gol të Leonardos dhe menjëherë ndenjëset e stadiumit u përfshinë nga flakët, ndërsa tifozët por edhe stjuardët u larguan duke vrapur midis turmës, për të vazhduar më pas festën e kësaj fitore dramatike.
Nga ndeshja Serbi – Shqipëri, luajtur po në stadiumin “Partizani” të Beogradit më 14 tetor 2014
Por kjo është një pamje e zakonshme në ambjentet sportive të Beogradit, duke përfshirë edhe ato të lojrave me dorë. Në derbin e vitit të kaluar u arrestuan 41 tifozë, ndërkohë që 35 policë mbetën të lënduar. Ndërsa në vitin 2007 u regjistrua një barbarizëm, kur një polic u plagos rëndë, pasi u tha se një tifoz i Crvena Zvezdës i futi me forcë një flakadan në gojë, që më pas shpërtheu.
