Avokati Spartak Ngjela ka komentuar sot gjatë një interviste televizive hetimet që ka nisur SPAK ndaj ish-presidentit Ilir Meta. Avokati tha se ky veprim i prokurorisë është tërësisht legjitim dhe duhet të vazhdojë të thellohet më tej, në kërkime jashtë vendit. Sakaq, ai tha se këtë herë Meta nuk do të ketë shpëtim, pasi SPAK nuk po drejtohet nga ne, por është nën monitorim të vazhdueshëm ndërkombëtar, dhe ka të drejtë të hetojë çdo politikan në drejtim të të cilit është ngritur një padi. Ngjela tha se irritimi i Metës dhe sulmet e tij vazhdimisht ndaj prokurorisë së posaçme, shtojnë dyshimet për fajësinë e tij.
“Ohu çe zgjasni muhabetin, SPAK-u nuk drejtohet nga ne, është në monitorim nga ndërkombëtarët, mësojeni dhe Metën. Dalin dhe këta analistët që nuk njohin shtetin, shteti është ligj moj zonjë, pati një denoncim nga një ish-deputet dhe SPAK-u do të nisë hetimet. Të më pyesësh mua që jam marrë me vite me hetimet, kështu sillen personat që janë të fajshëm, të pafajshmit thonë hajde përballemi në Gjykatë. Zonjë i pafajshmi merr famë botërore, të gjithë ish-kryeministrat janë nën akuzë, ku jemi këtu në Mesjetë? Këta i mori vala dhe i nxori në pushtet, nuk flitet kështu për shtetin. Nuk trembet SPAK-u nga Meta, deklaratat i bën për opinionin publik, çfarë janë këto mor? Sulme politike dhe luftë politike do të ketë gjithmonë, është gjë normale që një parti tjetër të ketë bërë denoncimin”, u shpreh Ngjela. Më tej ai tha se pafajësia do ti jepte Metës një famë botërore, ndërsa komentoi dhe protestat që priten nga opozita e bashkuar gjatë muajit Shtator.
