22 mars 1992-22 mars 2016, Partia Demokratike përkujton fitoren e parë ndaj të majtës
Sot mbushen 24 vjet nga 22 marsi, dita kur Partia Demokratike fitoi për herë të parë zgjedhjet. Ishin zgjedhje të parakohshme. Të parat zgjedhje pluraliste në Shqipëri u zhvilluan më 31 mars 1991, pak muaj pas rrëzimit të sistemit komunist në dhjetor 1990. Në ato zgjedhje PD garoi përballë PPSH dhe humbi. PPSH fitoi zonat rurale, ndërsa PD në qytete. Në vitin 1992 Partia Demokratike erdhi në pushtet me votën e shumicës dërrmuese së shqiptarëve.
Përmes një mesazhi në facebook, Basha përkujton fitoren e parë të PD-së.
“24 vjet me parë, me votë të lirë shqiptarët zgjodhën të ardhmen, zgjodhën shpresën, zgjodhën Partinë Demokratike. Në këtë 22 Mars çdo demokrat dhe jo vetëm është krenar për arritjet që vendi ka shënuar nën drejtimin e Partisë Demokratike. Rrëzimi i sistemit komunist dhe vendosja e pluralizmit në vend, ekonomia e tregut, liria per te besuar, menduar dhe shprehur, e drejta për t’u arsimuar, infrastruktura, Shqipëria në NATO, levizja e lirë, dhe rekomandimi për statusin kandidat në Bashkimin Europian janë vepra të qeverisjes së Partisë Demokratike.
Sot, më shumë se asnjëherë më parë në këto 24 vjet kjo ditë frymëzon çdo shqiptar për të luftuar në mbrojtje të votës, në garantimin e zgjedhjeve të lira dhe të ndershme.
Me votë ne do t’i çlirojmë qytetarët nga regjimi i varfërisë dhe i mjerimit, nga regjimi i dhunës dhe kërbaçit, nga rregjimi i padrejtësisë dhe i mashtrimit, nga rregjimi ku ligjin e bën krimineli dhe i riu apo e reja e sapodiplomuar, profesionisti i ndershëm apo intelektuali i guximshëm endet i papunë.
Me votë, me zgjedhje të lira dhe të ndershme, ashtu si më 22 mars shqiptarët do të hapin një rrugë të re shpresë dhe zhvillimi për Shqipërinë”, shkruan Basha.
