U nis në fillim të edicionit për të ardhur në Superiore, kishte mbështetjen e jashtëzakonshme të deputetit Tauland Balla, i cili e veshi me ngjyrat e “Rilindjes”, por asgjë nuk mjaftoi… Sopoti i Librazhdit, sezonin e ardhshëm do të luajë në Kategorinë e Dytë. Në takimin shtesë të luajtur në “Niko Dovana” të Durrësit, ishte Partizani B që e shkatërroi me rezultatin 4-1 dhe kështu kryeqytetasit fituan të drejtën për t’u ngjitur një kategori më lartë. Librazhdasit ishin një nga skuadrat mëkatare të sezonit, pasi nuk i luajtën me të njëjtin seriozitet të gjitha ndeshjet dhe kjo ishte një nga arsyet që mbërritën në “play out”, pasi nga cilësia e përbërjes ndoshta nuk i takonte. Ndërsa në 90 minutëshin e sotëm nuk kishin shumë për të bërë, sepse ky lloj Partizani që kishin përballë kishte marrë futbollistë nga skuadra që diskutoi titullin e madh me Skënderbeun, gjë që ia lejon rregullorja. Kështu në fushë ishin Trashi, Kalari, Atanda, Jaupaj (autor i dy golave), apo Ismaili, gjithashtu shënues. Ndërkohë që Mamurrasi i Ded Ndrecës mbeti në Kategorinë e Parë, duke ia mohuar këtë mundësi Naftëtarit. Tahirllari ishte shënuesi i golit të vetëm, por fitorja mund të ishte më e thellë në favor të kurbinasve.
Rezultatet e ndeshjeve “play out”
Sopoti – Partizani B 1-4
Mamurrasi – Naftëtari 1-0
