Bllokuesit e reformës do të kenë rezultate shumë negative në zgjedhjet e 2017
Kryeministri Edi Rama deklaroi sot në emisionin “Shih Programin” në TVSH se reforma në drejtësi si e tërë do të kërkojë vite, por si bazë për reformën është e domosdoshme paketa e ndryshimeve kushtetuese, e cila mund të votohet brenda muajit mars. Sigurisht, nëse do ketë vullnet për të gjetur marrëveshje në bazë të rekomandimeve të Komisionit të Venecias, është shprehur Rama.
“Nëse duam një reformë reale, politika duhet të bëjë një hap prapa dhe t’ia lërë këtë punë ekspertizës më të mirë të mundshme”, u shpreh Rama. Ai shtoi se, “Reforma nuk është tek teknikalitetet, por tek thelbi dhe thelbi është që kjo reformë do të sjellë një tronditje të sistemit të drejtësisë dhe premisa se cilido mund t’i shërbejë shqiptarëve në këtë sistem do të kalojë nga një proces rigoroz qëmtimi të kandidaturave që nga eksperienca tek pasuria etj”.
Rama tha se ajo palë politike që identifikohet si bllokuese e Reformës do të ketë një rezultat shumë negativ në zgjedhjet e ardhshme. Duke komentuar draftin e Venecias për Reformën në Drejtësi, Rama tha se, “Pjesa e parë e reformës ndryshimet në Kushtetutë hyjnë në proces, reforma në drejtësi si e tërë do kërkojë vite, por si bazë për reformën është domosdoshmërisht paketa e ndryshimeve kushtetuese. Në rast se do të ketë vullnet për të gjetur marrëveshje. Nuk jam në dijeni të debateve, i qëndroj asaj që nëse duam një reformë reale politika duhet të qëndrojë nga prapa dhe t’ia lërë ekspertizës më të mirë të mundshme.
Kurse duke folur për Byronë Kombëtare të Hetimit, Rama theksoi se, “Byroja e hetimit e ndërmjetësuar nga amerikanët nuk varet nga Policia, por prania e Prokurorisë ishte vendimtare. Thelbi është që kjo reformë do sjellë një tronditje të sistemit të drejtësisë. Rama tha se nuk ka çfarë të rinegociohet për Byronë Kombëtare të Hetimit. “Do bëhet një proces në komisionin e reformës dhe në atë proces sigurisht që do ketë takime. Ne do synojmë dakordësi me opozitën dhe nuk do fillojmë me planin B, por do synojmë planin A”, tha Rama.
Kryeministri komentoi edhe incidentin e ndodhur në sencën e fundit parlametare, ku disa deputetë të opozitës e qëlluan atë me vezë. “Duhet të pyesni ata që e bënë, sepse ajo që ndodhi nuk ka të bëjë me PS, pasi Armando Prenga është përjashtuar nga PS. Se kush janë fajtorë e kush janë të pafajshëm i takon gjykatës”, tha Rama.
Gazetari Enkel Demi e nisi intervistën me kryeministrin Rama me “thumba’ sapo hyri në studio. Ai i kërkoi Ramës që të shkonte më shpesh në TVSH, pasi sot që ka vajtur pati disa ndryshime “duke nisur që nga pastrimi dhe lyerja e mureve”. Në këtë çast Rama ndërroi vendin me gazetarin “për të mos e lënë atë në krahun e majtë”, siç tha kryeministri.
