Kryeministri Edi Rama vazhdon që të injorojë protestën e mijëra njerëzve, që për të katërtën ditë me radhë kanë mbushur bulevardin “Dëshmorët e Kombit”. Rama thotë se po të ishte për protestën ai nuk do të kishte reaguar fare, por i duhet të marrë vendime në emër të qeverisë. Përmes një komenti në rrjetet sociale, ai ka thënë se ata që protestojnë flasin përçart. Ndërsa tha që edhe katër vjet rresht të protestojnë qeveria do të vazhdojë me planet e saj.
“Sa për atë protestë ndërkohë që tërë Europa, përfshire edhe Shqipërinë, përballet me pasojat e para fare të një lufte, jo 4 dite po 4 muaj apo 4 vjet te vazhdoje asgjë nuk do kisha bare dhe s’kam pritur ata që shajnë e ulërijnë as për të mbrojtur familjen tende nga rritja e çmimit të energjisë dhe as për t’ju thëne te tërëve se brenda javës, domethënë sot do te kemi skenarët e përballimit të këtyre pasojave”, shkruan Rama. Kujtojmë se sot do të mblidhet Bordi i Administrimit të Karburantit, që sipas Ramës do të rivlerësojë çmimet, por qeveri harron se po i godet qytetarët me çmimin e lartë të bukës, të ushqimit dhe energjie elektrike.
