Stafi i tranzicionit të presidentit të zgjedhur amerikan, Donald Trump, ka lëshuar një urdhër të përgjithshëm që kërkon largimin e ambasadorëve të emëruar politikisht që pas ditës së përurimit të kreut të ri të Shtëpisë së Bardhë
Dekreti, i lëshuar “pa përjashtim” kërcënon të lërë Shtetet e Bashkuara pa diplomatë të konfirmuar nga Senati për muaj të tërë në shtete të rëndësishme si Gjermania, Kanadaja dhe Britania. Ndryshe nga e kaluara ku administrat e të dyja partive tregoheshin dorëlëshuar për zgjatjen e mandateve për një sërë ambasadorësh, Trump ka mbajtur një linjë të ashpër kundër tolerimit të të emëruarve politik të presidentit Obama.
Një zyrtar i lartë i ekipit të tranzicionit të Trumpit e përshkruan këtë si një çështje thjesht për t’u siguruar se të emëruarit e Obamës do të largohen nga qeveria në kohën e përcaktuar dhe se pas kësaj lëvizjeje nuk ka asnjë dashakeqësi. Zyrtari tha se ambasadorët nuk duhet të habiten kur t’iu vijë data e fundit e detyrës.
Direktiva, gjithsesi ka tronditur disi jetët personale të shumë ambasadorëve, të cilët po përpiqen të sigurojnë marrëveshje dhe të sigurojnë viza, që do t’u lejonin atyre të mbeteshin në vendet ku veprojnë, në mënyrë që fëmijët të vijojnë shkollën.
Ndër të prekurit e këtij dekreti janë ambasadori Stafford Fitzgerald Haney në Kosta Rika, Andreë H. Schapiro në Çeki; ambasadorja Denise Bauer në Belgjikë; si dhe Pamela Hamamoto, përfaqësuesja e përhershme në OKB.
Një ditë pas zgjedjeve të nëntorit, departamenti i Shtetit informoi të gjithë ambasadorët e emëruar politikish se duhej të dorëzonin dorëheqjet brenda 20 janarit. Ndërkohë që letra instruktonte se ata që dëshironin të kërkonin zgjatje të mandatit duhej të dorëzonin një kërkesë formale, ku të shpjegonin arsyet e tyre.
