Teksa vihet re një rehabilitim i politik juridik dhe politik i ish-ministrit të Brendshëm, Saimir Tahiri, ish-ministri tjetër i Brendshëm, Fatmir Xhafaj është shfaqur në krah të kryetarit të Bashkisë së Tiranës, Erion Veliaj, gjatë një dëgjese me banorët e njësisë numër 10 në kryeqytet.
Në aktivitetin në fjalë, i pari qysh pasi dha dorëheqjen, Xhafaj duket se i dërgoi një mesazh kryeministrit Edi Rama, por ndoshta jo vetëm ai, por edhe Erion Veliaj.
Xhafaj, madje ishte dje më shumë se cinik, kur foli në lidhje me njerëzit e lidhur pas një karrike, teksa shtoi që simboli i njeriut që shërben është lali Eri: “Ka njerëz që ulen në një karrige dhe janë të kënaqur që kanë kapur një karrige. Ka njerëz që marrin një pushtet dhe janë të lumtur që janë të pushtetshëm. Ka njerëz që vijnë për të shërbyer, që kanë një mision dhe që duan të lënë një gjurmë përmes mundësisë që u jep pushteti. Dhe ky është Erion Veliaj.”
Kjo dukje e tyre dje në publik, tashmë perceptohet si përurimi i luftës së brendshme mes Rilindjes dhe Partisë Socialiste. Fatmir Xhafaj dhe Rilindja e treguan që nuk martohen dot, kurse Erion Veliaj… mbetet një pikëpyetje sfiduese.
