Nga Marjon Gorica
Është pikërisht koha dhe momenti që të diskutohet për arsimin e lartë. Bazën e profesionalizmit për çdo të ri në këtë vend. Aq më tepër, kur kjo qeveri kërkon profesionistë, pasi siç duket vende pune (s)ka.
A ekziston në Shqipëri arsimi i lartë? A ka universitete në këtë vend dhe a funksionojnë ato??!
Çdo ditë e më tepër sheh vetëm pazare ,materializëm me dijen, biznes me diplomat e ushtrim pushteti nga pedagogët, thua se kanë gjithçka në dorë, megjithëse ata janë bërë pengesë për diplomimin e qindra studentëve ndër vite.
Në një kohë që kjo qeveri flet për reformën në arsim, për t’i kthyer dinjitetin arsimit të lartë në të njëjtën kohë, kjo qeveri po demoralizon çdo maturant e çdo student. Ndjekja e një politike anormale duke e çuar sistemin arsimor të këtij vendi në destabilitet, ku fiton i pasuri dhe jo i mençuri tregon haptazi sesa poshtë ka rënë vendi ynë. Si mundet të mirëarsimohet një i ri, kur ai e ka të pamundur të paguaj tarifën vjetore të vitit akademik? Aq më tepër, kur kushtet nga stafet pedagogjike dhe librat që duhet të studiojnë kanë çmime katastrofike për nivelin mesatar të jetesës.
Shumë e nderuar ministre nëse ky vend është në nivelin që ju thoni, përse fëmija juaj vendosi të studionte jashtë?
E urrej veten që linda në një vend të tillë, gjithashtu urrej që rritem në një vend të tillë, në këtë vend që do politikanë e shohin si bazë përfitimi e pasurimi personal. Nuk e di sesa do duroj, ashtu si unë dhe mijëra të rinj në këtë vend. Por, është bërë e pamundur jetesa parazite në Shqipërinë e qeverisur prej tyre. Na mban vetëm fakti që është për të ardhur keq që fati i këtij vendi të jetë si të doni ju. Kjo na ndalon të ikim, aq më tepër kjo është një shtysë që këtë vend ta bëjmë! T’i kthejmë dinjitetin!
Lider të historisë mbeten Ismail Qemali dhe Gjergj Kastrioti e jo disa palo politikan .
Nuk mund të quhet lider i politikës Edi Rama, Ilir Meta e as Lulzim Basha. Janë thjeshtë disa persona, mbase të futur gabimisht në politikë e që po e zaptojnë çdo centimetër të këtij vendi nga pushteti që ushtrojnë.
Është pikërisht kjo politikë që mori në qafë këtë sistem arsimor. Kjo politikë që në kohë fushatash elektorale i përdor shkollat dhe mësuesit sipas interesave të subjekteve politike.
Gjithashtu, është për të ardhur keq, kur sot e kupton që akoma shiten diploma nga subjektet private. E nëse dikush dyshon ftoj vetë zonjën ministre ta hetojmë së bashku, se për 2500 euro më kanë premtuar diplomë studimi pa ndjekur as një ditë shkollë.
