Samiti i Berlini/ Shtypi gjerman kundër ndryshimit të kufijve në Ballkan

Shtypi gjerman i bën sot jehonë Konferencës për Ballkanin që pritet të nisë në orën 15:00 në Berlin dhe organizohet nga kancelarja Merkel e presidenti Macron.

Në gazetën “Frankfurter Alemaine Caitung” është publikuar një shkrim i politikanëve gjermanë, Peter Bejer, Josip Juratoviç e Manuel Sarrazin që përfaqësojnë tre parti. Në artikullin me titull “Jo ndryshime kufijsh në Ballkan”, ata refuzojnë zonat e përcaktuara etnikisht, duke i konsideruar “Vizion të rrezikshëm nacionalistësh, që e kanë çuar rajonin në luftë të përgjakshme”. Gjithashtu, propozimin për këmbim të territoreve e cilësojnë “antikushtetues”, që vendos në pikëpyetje multietnicitetin e Kosovës, Kushtetuta e së cilës e përcakton qartë mosndarjen e vendit. Deputetët e Bundestagut: Bejer, Juratoviç e Sarrazin shtojnë se “Propozimi do të ishte kapitullim i vlerave europiane”.

Edhe “Die Welt” i kushton vëmendje Samitit të Berlinit. Shkrimi me titull: “Merkel mbron trashëgiminë e saj në Ballkan”, theksohet se Kancelarja gjermane synon të pengojë ripërcaktimin e kufijve në rajon. Gazeta shtron pyetjen nëse “A është ajo aq e fortë, sa t’i japë fund debatit për kufij të rinj?” dhe thekson se “përgjigjen do ta japë takimi i sotëm në Berlin”. Gazeta tjetër gjermane “Sidojçe Cajtung” vlerëson qëndrimin e qartë të Merkelit kundër ndryshimit të kufijve, si ide që sërish rrezikon të ndezë fitilin e fuçisë së barutit në Ballkan.