“Shpresoj shumë që qytetarët nuk do sillen si dele dhe deputetët nuk do jenë çobanë…”
Deputetja e PDIU-së, Mesila Doda, ka reaguar për vendimin e qeverisë për të vënë taksë qytetarëve për Rrugën e Kombit dhe paralajmërimi për taksimin e tetë rrugëve të tjera. Ajo e vlerëson si vjedhje dhe varfërim të mëtejshëm të shqiptarëve këtë vendim për t’i dhënë me konçesion rrugët e vendit.
Doda kërkon që dikush të na sqarojë se ku shkon taksa e qarkullimit që paguajnë qytetarët shqiptarë. Përmes një statusi në facebook, Doda pyet autoritet shqiptare pse nuk shtrohet asnjë kilometër rrugë, por veçse taksohet e mbitaksohet qytetari për rugët ekzistuese, të cilat janë në gjendje të mjerueshme.
Deklarata
Çfarë po ndodh me pagesat e rrugëve në Shqipëri është paralajmërimi i vjedhjes dhe varfërimit të mëtejshëm të qytetarit shqiptar. Sot mediat paralajmeruan se do të ketë edhe 8 rrugë të tjera me pagesë, por ende askush nuk spjegon pse nuk na është dhënë një kilometër rrugë e re e shtruar, dhe pse rrugët e ndërtuara po prishen përditë. Ku shkon taksa e qarkullimit që paguajmë? Gjendja e rrugëve është katastrofike, as investime, as rehabilitime…vetëm tarifime, gjoba dhe tani taksa mbi taksa…
Sikur zyrtarët e lartë të harxhonin për të ndërtuar, gjysmën e kohës që harxhojnë për të sajuar pagesa e varfërim të mëtejshëm të qytetarit, ky vend do ishte ndryshe. Shpresoj shumë që qytetaret nuk do sillen si dele dhe deputetët nuk do jenë çobanë..”, shkruan deputetja Mesila Doda.
