Arben Ndoka prezantoi zyrtarisht prefektin e Lezhës, reagon PD: Rama sfidë ndaj dekriminalizimit
Ish-deputeti socialist, Arben Ndoka, ishte i ngarkuari i kryeministri Rama për të prezantuar në Lezhë prefektin e ri, të emëruar së fundmi nga qeveria. Arben Ndoka ka lënë mandatin e deputetit, pasi opozita e akuzoi për të shukarën e tij kriminale, të lidhur me trafik prostitucioni. Pas largimit nga grupi parlamentar socialist, Rama e ka angazhuar atë me drejtimin e Partisë Socilaiste në Lezhë. Me këtë status, Arben Ndoka prezantoi prefektin e ri të Lezhës, Eduard Ndreca. Ky i fundit zëvëndësoi në këtë post Altin Jakun, i cili u largua nga kjo detyrë pasi u akuzua për kërcënime nga deputeti socialist Eduard Ndocaj. Prezantimin e Ndrecës nga Arben Ndoka, Partia Demokratike e ka cilësuar si një sfidë që i bëhet procesit të dekriminalizimit.
Sekretari i Përgjithshëm Arben Ristani tha sot: Departamenti amerikan i shtetit e cilësoi të papranueshme që Arben Ndoka, i dënuar në Itali për trafik prostitucioni dhe rrëmbim personi, të ishte pjesë e parlamentit. Sekretari Kerry, pasi e vlerësoi dje në Tiranë procesin e dekriminalizimit, e veçoi atë si sukses dhe model që duhet ndjekur. E megjithatë, ja ku është i zgjedhuri i Edi Ramës, i besuari i tij në Lezhë, duke prezantuar Prefektin e Qarkut. Ja ku është i dënuari që, pas denoncimeve të opozitës, pas qëndrimeve të partnerëve ndërkombëtarë, dhe pasi ligji i dekriminalizimit e nxori jashtë parlamentit, sot, me bekimin e Edi Ramës, qeveris Lezhën, bën emërime, shkarkime, tenderime. Vendos për çdo gjë. Edi Rama sfidon hapur dekriminalizimin, sfidon hapur mesazhin e John Kerry. Ai vazhdon t’u japë pushtet personave të inkriminuar, vazhdon ti mbajë ata afër, dhe po i përgatit ata për zgjedhjet që po vijnë për të deformuar votën e lirë”, tha Ristani.
