Reforma në drejtësi përfshihet në kalendarin 3 javor të punimeve të Kuvendit. Në fund të qershorit është parashikuar afati i mundshëm për miratimin e saj.
Së pari reforma do të kalojë për rishqyrtim në Komisionin e Ligjeve. Më pas deputetët në Kuvend kanë afat të diskutojnë dhe të miratojnë paketën e ndryshimeve kushtetuese për reformën, duke filluar nga 13 qershori deri me 1 korrik.
Vendimi për përfshirjen e saj në kalendarin 3 javor të punimeve ka ardhur pas paralajmërimit të kryeministrit Rama në mbyllje të takimit me Bashën si dhe deklaratave të Ambasadave të SHBA dhe BE një ditë më parë.
I ashpër ka qenë reagimi i PD që e ka cilësuar këtë veprim skandal, pasi sipas tyre ka kaluar në fshehtësi. Edi Paloka është shprehur se: “Drafti ka kaluar ilegalisht në Konferencën e Kryetarëve. Drafti ka kaluar në fshehtësi, pa dijeninë tonë. Paketa jo në kalendarin që na u vu në dispozicion. Ky është skandal, do e ndjekim”.
