Kryeministri Edi Rama ka deklaruar se e vetmja gjë që nuk ka ndryshuar gjatë qeverisjes së tij në krahasim me të shkuarën është drejtësia.
“Shqipëria që kishim dhe Shqipëria që kemi janë njësoj kur vjen puna tek drejtësia, ndoshta me një ndryshim të vogël, mund të mos jetë dhe i vogël. Në Shqipërinë që kishim, gjykatësit, prokurorët dhe politikanët e korruptuar as nuk kishin frikë, sot kanë frikë”, tha Rama.
Gjatë një takimi me profesionistët e rinj të PS-së, Rama shprehu ambicien për ta bërë Tiranën kryeqytetin me hapësirë më të madhe këmbësore në Europën lindore, ku theksoi se këtë mund ta bëjë vetëm Lali Eri dhe jo xhaxhi Luli.
“Sot kaluam planin e Tiranës dhe ambicia është shumë e qartë, të kemi qytetin apo kryeqytetin me hapësirë më të madhe këmbësore në Europën lindore. Është një ambicie që gjithëkush mund ta definojë në letër ama jo të gjithë mund ta bëjnë realitet, duhet lali Eri dhe jo xhaxhi Luli. Me lali Erin ka punë me xhaxhi Lulin ka gjumë”, u shpreh Rama.
